Nos turismo ta nos unico pilar economico. Tin 40 mil persona, directa y indirectamente cu ta biba di turismo. Na momento cu e ta duna señal negativo cu ta core den cifranan cora, e fondonan cu tin disponibel mester wordo uza eficientemente, specialmente y primordialmente pa mercadea nos turismo. Segun parlamentario di fraccion di MEP, Dangui Oduber, na 2011, un ley a wordo presenta na Parlamento pa converti ATA den un Sui Generis. Fraccion di AVP y e Gobierno e tempo ey tabata sa kico tabata e intencion di e minister di Turismo. E tempo fraccion di MEP no a aproba e ley aki, pero e fraccion di AVP si, cu e fondonan aki cu wordo genera, tin cu wordo uza pa mercadeo primordialmente di turismo. Loke a nota den e ultimo temponan aki, hopi di e fondonan aki ta wordo uza den infrastructura, den siguridad, cual ta bon, pasobra MEP mes a boga cu nos kier un pais mas sigur. E intencion no ta pa uza tur e fondonan cu ta destina pa turismo, dado momento e fondonan aki tin cu wordo aloca pa por ehempel siguridad. Cada minister tin cu asumi nan responsabilidad y den un Gobierno tin cu fiha prioridad.
Manera cu a bisa durante e manifestacion, e marcha cu prioridad awor aki ta siguridad di nos Pueblo.
E insiguridad ta sigui, segun e parlamentario. Comision cu a organisa e marcha a pidi 10 miyon di inmediato pa wordo aloca pa combati criminalidad. No a wak esaki sosode. Loke si a nota ta cu minister di Turismo tabata dispuesto pa aloca 5 miyon pa minister di Husticia, cual esey no tabata e intencion. Den cuadro di gobernacion, ora cu mira e gastonan, prioridadnan inecesario, den cuadro di e presupuesto 2017, mester por tin suma disponibel pa aloca 10 miyon pa e minister di husticia por combati criminalidad. Si esey ta e intencion, cu cada bes mester bay haci peticion na e fondo di turismo, pa un of otro prioridad di Gobierno, e ora ta coy henter e fondo di ATA, mand’e bek pa Algemene Middelen y laganan conhuntamente como conseho di minister, dicidi kico ta prioridad. Ta aproba un ley na 2011 cu e fondonan aki ta wordo uza pa turismo y awor a para bisa cu e minister di turismo, cada bes peticion ta wordo haci na dje of e ta inverti e placa caminda e ta mira como prioridad, manera cu a nota cu fondonan di turismo ta wordo uza den infrastructura y siguridad, entre otro. Asina por keda menciona y e parlamentario no ta kere cu esey ta intencion na momento cu tin turismo na e momentonan aki cu lo bay cera un aña basta malo. E pronosticonan ta keda mesun cos, tambe malo y loke ta preocupa mas cu otro aña ATA ta core riesgo di core den cora pa prome biaha, cual ta un preocupacion serio cu tin pasobra normalmente, durante e ultimo 4 of 5 añanan aki, ATA no tabata tin problema cu cashflow. Ta premira cu otro aña lo bay bira mas dificil compara cu 2016, Dangui Oduber a splica.