Diasabra mainta, Central di Polis ta manda un patruya pa e beach dilanti di Amsterdam Manor, pa intermedia. Na nan yega polisnan ta papia cu e dama N.A., cu ta declara cu e tabata sinta su so den autobus B-75 y el a baha na e bushalte na Ritz Carlton. Segun su declaracion ora cu el a baha el a bin ripara cu el a laga su celular den e bus. El a ripara cu e bus a core bay den direccion zuid y a para na altura di Marriott Hotel. E la wak un dama color cla drenta den e bus. El a zwaai pa hala atencion di e chauffeur, pero esaki no a wak’e. Un auto cu tabata pasando a dun’e un lift y a ofrece pa hib’e na unda e bus tabata bayendo. El a purba yama ariba su celular, pero esaki tabata paga. Nan a logra haya e bus na altura di Amsterdam Manor. Aki N.A. ta insulta e otro dama kende el a acusa di a horta su celular. Via e celular die chauffeur el a yama ariba su celular y aki el a haya un cabayero di habla ingles na liña, kende a declara cu e tabata tin e celular den su poder y cu e tabata wardando na Quiznos. No a keda N.A. nada mas di ofrece su disculpa na e otro dama.
Polis a hiba N.A. na Quiznos unda cu nan a topa cu e turista B.M., a entrega N.A. su celular. El a conta cu e tabata canando den cercania di Ritz Carlton/Marriott ora cu nan a wak e celular benta abao. Polisnan a hala atencion di e dama N.A., riba su actuacion y el a mustra comprension.