E incidente aki a tuma luga na 2015, caminda cu un dama a sufri un accidente basta serio, na momento cu e tabata controlando motor di su Go-Kart, algo a bay robes. Su cabey a keda pega den e motor y a ranca esaki.
Su cabey a wordo practicamente ranca for di e cuero, di manera cu urgencia ambulance a wordo solicita na e sitio, caminda cu e dama a wordo hiba hospital pa tratamento medico.
Awe na 2017, ainda e dama ta sufriendo pa loke a pas’e, caminda cu riba Facebook, e mes ta relata cu e ta cansa di warda y e ta haci un yamado e sector di salubridad riba e isla, tanto na hospital, dokternan y AZV.
El a splica cu despues di e teribel accidente cu el a pasa aden riba e pista di Go-Karting y di un cirugia mal elabora pa e dokternan di hospital, el a suplica na e dokternan pa mand’e pa Colombia, ya cu e caso a bay for di nan control.
Lamentablemente e unico respuesta cu el a haya ta cu AZV no lo mande pa un “second opinion”, ya cu esun prome tabata suficiente, manera cu hende no merece un di dos oportunidad, el a splica.
Ki grave tin cu su caso pa por a haya un traslado, el a cuestiona. Acaso den e 4 lunanan hospitalisa e no a mira con nan tabata manda hende den exterior cu un simpel dolor den un dede di pia, el a agrega. Claro si nos ta papia di un hende comun pa nan; otro caso lo ta yiu di un hende di renombre of di poder riba e isla.
Ta ora pa dokternan, hospital y AZV stop di hunga cu bida di hende, ningun hende sa e sufrimento cu e ta bibando aden y ta facil pa hari tur ora, ta loke e dama a bisa finalmente.