Durante e siman di 2 pa 6 di Mei, cu na Estados Unidos ta conoci como e National Children’s Mental Health Awareness Week, Sra. Esther Groenewegen, procedente di Hulanda, a duna diferente training na Aruba riba e topico di Hechtingsproblematiek. Sra. Groenewegen pa medio di su experiencia personal a capacita su mes (ervaringsdeskundige) door di tin un yiu biologico cu tin Reactieve Hechtingsstoornis, na Ingles conoci como Reactive Attachment Disorder. El a duna un charla na Centro Orthopedagogico na Dakota y cuatro training, entre cual dos pa maestronan y hulpverleners, un pa mayornan y un pa esnan cu ta traha na centronan di cuido pa mucha of cu ta traha boluntariamente cu mucha.
Muchanan cu tin di haber cu Hechtingsproblematiek door di factornan di stress den barica y/of trauma den e prome añanan di bida no a afera nan mes (hecht) di un forma saludabel nan nan mayor (biologico of no-biologico), a consecuencia di esaki por sufri efectonan grandi riba formacion di nan celebro y riba nan desaroyo.
Sra. Groenewegen, ta tambe autor di e e-book “Monster in de klas,” cual por download via su website www.alshechtennietvanzelfgaat.nl. Na Hulanda e ta dunando training riba e area di Hechtingsproblematiek desde algun tempo caba. Sra. Groenewegen ta bou guia di entre otro e mentornan Mericano manera Nancy Thomas, Teresa Gueard y Deborah Hage. E ta continuamente sigui desaroyonan di expertonan di trauma manera Bessel van der Kolk, Bruce Perry, Gabor Mate y Gordon Neufeld. Su meta ta pa haci e trastorno Hechtingsstoornis mesun conoci y manehabel cu por ehempel ADHD y Autismo.
Na Aruba e training aki tabata hopi exitoso. Participantenan na e trainingnan informativo aki, cualnan tabata den salanan completamente yen, a haya informacion balioso riba con un celebro afecta pa trauma ta funciona y con nos por comprende y yuda especialmente e muchanan aki miho. Hechtingsproblematiek Aruba ta manda un danki enorme pa e sosten financiero di e organisacionnan: Cede Aruba, Kiwanis Club of Palm Beach, Kiwanis Club of Aruba, Tienda di Educacion, Fundacion Pa Nos Muchanan y Vibes for You(th). Danki na nan aporte por a realisa e trainingnan aki na Aruba.
Pa mas informacion riba e topico por like e Facebook page Hechtingsproblematiek Aruba of manda un mail pa [email protected]. Riba e combinacion di foto por haya un bista di algun di e trainingnan y e participantenan.