Riba diamars 21 Mei 2019, Ministerio di Desaroyo Economico (MEO) di Corsou hunto cu Caribbean Export Development Agency ta organisa un Management Consultants Training cu lo tuma luga na World Trade Center na Corsou. Pa cu esaki ta invita tambe Management Consultants di Aruba cu ta interesa den e uzo di “ISO 20700 Project Self-Declaration Checklist”. Esaki ta encera e conocemento riba e puntonan pa compronde un Cliente su necesidad pa cu e Consultant. ISO 20700 ta un standard internacional cu a surgi di investigacion y experiencia amplio di Management Consultants rond di mundo. E participante lo siña uza esaki pa medio di ehempelnan practico y rollenspel. Pa medio di e training aki lo yuda profesionalnan na Aruba y Corsou desaroya e profesion aki mas y asina sostene su contribucion na e economia di e paisnan aki, specialmente si cuminsa exporta e servicionan aki pafor di Aruba y Corsou. E combinacion di participantenan di Aruba y Corsow ta duna tambe oportunidad pa intercambia idea y inicia cooperacion comercial.
Pa por facilita e participacion di interesadonan, Caribbean Export lo cubri e gasto di ticket y acomodacion pa Management Consultants cu registra prome cu 14 di mei 2019. Un prerekisito ta e compra di e ISO 20700 na e balor di EUR 140. E link pa por registra como Mangement Consultant participando na e training ta: https://www.surveymonkey.com/r/CICMCCUR .
E training organisa pa MEO y Caribbean Export lo tuma luga den e Siman Nacional pa Promove Exportacion na Corsou cu lo tuma luga di 18 – 24 di mei 2019. Durante e siman aki lo tin diferente presentacion riba exportacion, incluyendo exportacion di servicio. Participantenan di e ISO training lo por asisti na e presentacionnan di e Evento aki free-of-charge. Pa por registra pa e Siman Nacional pa Promove Exportacion (National Export Awareness Week) por registra pa medio di e siguiente link: https://www.surveymonkey.com/r/NEAW2019events .