Curso di introduccion ‘Traha Sistemico’

Siman pasa pa tres dia y mei, a tuma luga un curso di introduccion ‘traha sistemico’. Un inciativa y cooperacion entre Departamento di Asunto Social y Universidad di Aruba su facultad di Ciencia y Arte, den particular e programa ‘Social Work & Development’. E curso aki a keda facilita door di Enid de Kort y Chris Palm di Boneiro.

Faciliatadornan
Enid de Kort ta un terapista di sistema y actualmente ta trahando na Departamento di Asunto Social. Chris Palm ta director di Centro di Hoben y Famia na Boneiro. E dos profesionalnan aki tabata encarga cu e curso cu a tuma luga na Casa Del Mar Aruba Beach Resort & Timeshare y cu a conta cu 71 participante cual tabata consisti di entre otro trahadonan social di diferente Departamento y Fundacionnan na Aruba.

Curso
E prome dia a cuminsa cu un introduccion general, e historia di ‘traha sistemico’, terapia di famia y di relacion. Sigui pa diferente temanan manera entre otro famianan di menos recurso, famianan mas moderno y violencia domestico. Tambe a duna un splicacion amplio, incluyendo ‘traha sistemico’ den scolnan y den barionan. Na final di e di prome dia a trata ‘traha sistemico‘ den e cultura Antiano y e desafionan den cultura relaciona cu e idioma.
Riba e di dos dia, Chris Palm a cuminsa cu un ripiticion di e prome dia y despues hunto cu Enid de Kort a sigui cu un rond di pregunta. Enid de Kort riba e di dos dia a elabora riba famia consistiendo di un mayor so y famianan mescla. E di tres dia a trata terapia di relacion, cual tabata uno hopi extenso. Temanan manera terapia narativo di e prome, di dos y di tres generacion tambe a wordo trata dunando atencion na husticia social di entre otro pobresa y discriminacion. Riba e di tres dia a sigui cu ehercicionan di casonan ‘multi-sistemico’ y na final a papia tocante implementacion, progreso y por ultimo un evaluacion.
E tres dia y mei nan aki tabata consisti di hopi informacion, tareanan intensivo y e participantenan a siña hopi. Na final un danki grandi ta bay na e dos facilitadonan cu tabata Chris Palm y Enid de Kort pa a duna e curso aki y ta spera mas tipo di cursonan manera esun aki den futuro. E cooperacion, entre Departamento Asunto Social y Universidad di Aruba, sigur a resulta den uno exitoso.

Comments

comments