E anochi di curso, Family & Friends CPR, tabata uno hopi interesante, un exito serio. Esaki tabata notabel den e participantenan cu a practica durante di henter e curso. Nan tabata haya varios ripiticion con pa duna CPR for di baby te cu hende grandi. Tambe con pa trata un persona cu Choke (pega cu algo den garganta).
Loke a resalta ora cu a publica di e curso di CPR & CHOKING den Centro di Bario Brazil ta, e interes enorme den nos comunidad pa cursonan asina. Desde e prome dia cu a habri inscripcion ya e cantidad di interesadonan a surpasa e 30 cuponan cu tabata di acepta. Cu despues a bira 65 cursista mientras ainda a keda alrededor di 40 interesando riba lista di reserva. Esaki ta un yamada serio pa duna mas di e cursonan aki specialmente na schoolnan. Hopi ta esunnan cu ya a yega di haci e cursonan aki caba, por ehempel maestronan, pero mester keda wordo ripiti cada tanto tempo.
Un danki ta bay na e team di profesional cu a duna e curso specialmente na Sra. Olga Tromp, un nurse di Hospital di mas cu 40 aña di experencia y Sr. John Tromp IMSAN, cu a encabesa e curso hunto cu e profesionalnan den ramo aki cu ta Azriah Palm, Melvin Tromp, Joshmar Hoek, Carlos Peterson, Leon Hooker, Lucretia y Gino.
Aruba ta conta cu 65 persona mas cu a ricibi nan certificado. Un curso di orientacion na nivel pa por yuda un persona cu mester un ayudo medico te ora ayudo profesional yega na e sitio. Centro di Bario Brazil ta bay sigui organisa mas curso di CPR y Choking, alimentacion pero tambe di actividadnan fisico y salud.