Segun Erik Maduro, hefe di Departamento di Siguridad, nan tabata tin un curso di inspector di siguridad cu ta dura 5 dia, un siman, 8 ora, cual ta bira un curso di 40 ora. E tin su parti practico y ta forma parti pa siguridad riba trabao pa hendenan den construccion specialmente, cu ta traha cu grua, pa nan ta den bon condiccion y depende di nan garantia di operacion. E curso aki a wordo duna pa CICB Crane Inspection & Certification Bureau.
Maduro a splica cu un grua no por ta den operacion si e no ta aproba. E mester ta aproba pa asina aki duna garantia cu tur su funcionamento ta cumpli cu normanan y asina aki garantisa cu e trabao por wordo haci. E ta depende tambe di bida di hende, di ekipo y e ambiente di trabao.
Maduro a sigui splica cu ora cu un grua ta bay den funcion, tambe mester tin un persona pa controla e grua, pa wak si e posicion ta bon, wak e tera, si e ta solido of e no ta solido. Si e pata di e grua, si e mester di un plataforma mas hancho di por lo menos 3 biaha e area di su mesun pata, pa sigura cu e grua perde su stabilidad. Asina aki tin mas punto cu mester wak prome cu e grua bay den funcion, pa preveni cu algo por sosode.
Durante e curso aki tin tres inspector di DTI, tambe tin ambetnaarnan di minister presente y tambe tin otro hendenan priva, cu ta tumando e curso. Asina aki pa forma nan mes pa por duna e servicio aki na e doñonan cu tin grua, pa prome cu nan bay den servicio, cu nan wordo aproba y esaki mester sosode periodicamente, por lo menos 1 biaha pa aña.
Na prome instante e doño tin cu percura pa su grua ta na ordo. E mester mantene un logbook pa mantencion y operacion. E tin cu tene un registro caminda cu e ta duna indicacion cu e grua ta wordo manteni y ta wordo poni den funcion. E inspector su trabao ta pa controla si e grua ta cumpli cu normanan di grua. Una bes cu esey sosode, e ta duna un certificacion na e doño di trabao cu e grua aki por bay den servicio.