CURPA awo den e lucha pa voto despues di a logra 587 firma

Diabierna mainta e ultimo partido registra na Censo a haya su firma no. 587 p’asina por participa den eleccion parlamentario dia 25 di juni awor. Ta trata di partido CURPA.

CURPA a participa pa prome biaha den un eleccion di Parlamento na aña 2009 y a ricibi solamente 139 voto. Hopi a pensa cu lo no a tuma nan asina hopi dia pa logra e firmanan necesario. Pero awe, riba e di cinco dia nan a keda cla.

Esaki ta nifica cu pa prome biaha lo tin no menos cu 12 partido participando, cada un riba nan mes, den eleccion 2021. Despues di a registra e partidonan pa eleccion, no por haci cambio pa partidonan uni mas pa bay eleccion hunto.

Aruba a conoce hopi partido chikito den transcurso di añanan y mayoria a keda te ey tambe. Nan a yega te na un of dos asiento y despues a disparce for di panorama y otronan no a logra ni un asiento.

Practicamente tur eleccion tin un partido nobo y e biaha’ki el a bira te hasta tres partido nobo: HTC, PP y Accion21. Tanto partidonan CURPA, Raiz UPP y MAS a yega di participa den eleccion caba den pasado pero no a logra asiento. Ta prome biaha cu tin asina hopi partido ta participa den un eleccion di Parlamento y cu no a logra yega cu un lista di 29 candidato.

Comments

comments