Entre 2 y 9 di november ultimo a tuma luga e festival di buki pa mucha organisa pa Biblioteca Nacional. E autornan di e buki multilingual Curasonchi (Hearty, Corazoncito, Hartje), esta Levi Silvanie y Rosabelle Illes, a bishita un total di 11 klas na Aruba, entrenan kleuterklas, 1e klas y 2e klas. Tambe e autornan a tene un presentacion publico na Biblioteca Nacional unda cu un total di 150 mucha a asisti.
Curasonchi ta un curason cu a cansa di manda amor henter dia sin por mira e impacto di su funcion. Pa e motibo ey, un dia e ta dicidi di bay keiro rond di e curpa pa busca un proposito mas grandi. Durante su aventura, e ta explora e bida di un wowo, nanishi, boca, horea, man y pia. Na final Curasonchi ta bin realisa con importante un curason chikito den un mundo grandi ta. Den un forma interactivo, e autornan a presenta partinan di e storia na e scolnan cu a keda bishita.
Por a nota cu hopi scol tawata bon prepara pa e bishita di Curasonchi. Algun a traha poesia y cantica pa Curasonchi, otronan a traha pechi di Curasonchi cu tur mucha por a bisti y un kleuterschool a traha un puzzel grandi di Curasonchi cu nan a regala na e autornan.
Tawata prome biaha cu ambos autor ta participa na e festival di buki pa mucha. Tanto Levi como Rosabelle a keda hopi satisfecho y agradecido na Biblioteca Nacional cu a duna Curasonchi un rol importante den e siman aki como cu e tema di e festival di e aña aki ta “Amistad” y e curason ta un simbolo perfecto pa esaki. Pa mas informacion tocante e proyecto aki por bishita www.heartythebook.com