Willemstad Curacao: Djasabra 11 di novèmber 2023 alrededor di 06.13’or, Sentral di Polis a risibí notifikaskon ku tin un aksidente di tráfiko ku a kaba di tuma lugá riba Kaminda Próspero “Popo” Rojer na altura di Hòfi Apostel i ku tin un persona gravemente heridá.
Mesora a dirigí un unidat di warda di polis di Barber na e sítio. Na yegada di e unidat, el a topa ku un dama shofùr ku no tabata duna señal di bida.
For di investigashon preliminar a sali na kla, ku dos vehíkulo a dal frontal kontra di otro. Na e sítio tabatin dos persona mas heridá i mesora a pidi presensia di ambulans, ku a transportá e víktimanan den un situashon krítiko pa Sala di Emergensia di C.M.C. Alrededor di 07.45’or, Sentral di Polis a keda notifiká pa dòkter di polis ku e dama Minerva M. Janzen nasé na Kòrsou dia 26 di desèmber 1975, a fayesé na e sítio a konsekuensia di herídanan ku el a sufri durante di e aksidente.
Personal di Departamento di Tráfiko ta investigando e kaso pa determiná eksaktamente kiko a sosodé.