Curacao: Prospecto pa re-apertura di entre otro kantornan di number, salonnan di beyesa y barberianan

Willemstad Curacao: Minister di Desaroyo Ekonómiko, sra. Giselle Mc William, a reuní dia 30 di aprel último ku representante di tantu sektor di beyesa (salonnan di beyesa i barberia) komo tambe representante di riferonan na Kòrsou (wega di number).
Meta di ámbos reunion tabata pa deliberá ku kada sektor riba puntonan krusial ku esakinan lo mester tene den konsiderashon na momentu di reanudá nan trabou. Manera ya a keda menshoná anteriormente, e sektornan aki posiblemente lo mester ta siguiente den e proseso di de-eskalashon ku Gobièrnu di Kòrsou a bin ta implementá den kuadro di COVID-19.
Durante reunion ku representantenan di salonnan di beyesa i barberonan, a trata entre otro puntonan prinsipal di higiena ku kada lokalidat i tambe profeshonalnan lo mester tene na kuenta na momentu ku nan por kuminsá traha atrobe. Tambe a bini dilanti posibel aplikashon di e reglanan di distansia sosial i kon lo por ehekutá esaki den e sektor.
Aki e representantenan a trese diferente punto práktiko dilanti ku ya kaba komo sektor nan mes a pensa riba dje i kon lo por implementá esakinan. Ta trata aki por ehèmpel di reglanan di higiena i distansia sosial ku lo konta pa e empleadonan den e salon di beyesa i e barberia pero tambe kon ta e mihó manera pa por atendé ku e kliente ku lo bini pa risibí nan servisio.
Vários di e aspektonan ku a bini dilanti ta basá riba práktikanan ku ya a resultá eksitoso den eksterior kombiná ku propio konosementu i eksperensia di nos propio pelukero i barberonan konforme e realidat di nos sektor. Mas aleu e representantenan di e sektor ya a manda nan sugerensianan por eskrito pa minister Mc William relashoná ku e protokòl ku e sektor lo mester mantené nan mes na dje.
Prome ku e reunion ku representante di riferonan, Minister ya a risibí un proposishon di e sektor aki por eskrito. Durante e reunion, e representantenan a elaborá di forma mas amplio i detayá riba e puntonan menshoná den e proposishon aki. E representantenan a splika por ehèmpel di e vital importansia di e sektor aki pa nos ekonomia i tabata sumamente alentador pa skucha ku e trahadónan den e sektor ta kla pa traha i duna un man na nos ekonomia.
Ku e sektor aki tambe Minister Mc William a hasi palabrashonnan konkreto riba aspektonan di higiena i distansia sosial ku lo mester tene kuenta kuné tantu pa e trahadó i su famia komo tambe pa e kliente ku lo bishita e respektivo kantornan di number na momentu ku esakinan habri bek.
E siguiente paso ta, ku e representantenan di ámbos sektor lo bai bek i kaba di deliberá riba e diferente puntonan ku a bini dilanti durante e reunion ku minister i formulá un proposishon konkreto ku nan lo mester manda bek pa minister di Desaroyo Ekonómiko. E proposishonnan aki lo keda formulá den protokòlnan konkreto, ku lo mester keda apliká na momentu ku e sektornan aki bini na remarke pa por bolbe habri.
E protokòlnan aki lo sirbi pa transparensia di e palabrashonnan tantu serka trahadónan di ámbos sektor komo tambe nan klientenan i lo kontribuí riba término largu na un maneho moderno i di kalidat haltu den nos sistema di servisio kual ta pas den e normal nobo ku e pandemia aki a introdusí nos ekonomia nos na dje.

Comments

comments