Curacao a conoce e prome y e di dos morto den trafico pa 2020.
Alrededor di 23.39’or di djabièrnè 24 di yanüari 2020, Sentral di Polis a risibí informashon ku e motosiklista ku den oranan mas trempan di anochi tabata enbolbí den un aksidente di tráfiko riba Roodeweg (komunikado di prensa 039/2020), a fayesé a konsekuensia di e múltiple leshonnan ku el a sufri.
E víktima a keda identifiká komo Michelangelo Nicolaas Beaumont, nase na Kòrsou dia 23 di desèmber 1974.
E di dos morto
Djasabra 25 di yanüari 2020, alrededor di 14.58’or, Sentral di Polis a risibí notifikashon di un aksidente di tráfiko ku a tuma lugá dilanti un minimarket den Dein.
E unidat polisial ku a yega na e sitio a kuminsá ku un investigashon preliminar i a resultá ku un dama manehando su vehíkulo a kore yega pa stashoná e vehíkulo dilanti di un minimarket. Pa un motibu of otro na lugá di e shofúr primi brek, su pia a resultá riba e pedal di gas. Dor di e akto aki e vehíkulo a bai dilanti i alkansá un hòmber ku tabata sintá riba un stul riba e stupi dilanti di e minimarket. A konsekuensia di esaki e hòmber a keda heridá. Ambulans a transportá e víktima den situashon di prekupashon pa poliklínika di CMC pa tratamentu médiko mas avansá.
Djadumingu 26 di yanüari 2020, alrededor di 06.17’or, polis a risibí informashon ku e hòmber Jose Antonio Farrell, nasé na Kòrsou 17 di aprel 1947, ku tabata involví den e aksidente ariba menshoná a fayesé a konsekuensia di e leshonnan ku e la risibí.
Personal di tráfiko ta kontinuá ku e investigashon.