Willemstad Curacao: Djamars 22 di yanüari 2019 alrededor di 21.06 or, Sentral di Polis a risibí informashon di un aksidente di tráfiko ku a tuma lugá riba e krusada Andres Belloweg/Pater Poeiszstraat.
Na yegada di e promé unidat, nan a topa ku un hòmber drumí abou banda di un bròmer ku herida na kabes. For di un investigashon preliminar ku polis a hasi na e sitio a resultá ku un pikòp ku tabata kore riba Shastaweg a subi e krusada Andres Belloweg/Pater Poeiszstraat sin duna preferensia na e bròmer ku tabata kore riba Andres Belloweg den direkshon di Puebloweg.
Dor di e akto aki shofùr di e bròmer ku no tabatin un hèlmu bistí a bai dal ku su kabes den banda di e pikòp. Despues di e impakto e pikòp a kore bai, pa despues okupantenan mèldu ku un ratu promé nan tabata involví den e aksidente riba e krusada ariba menshoná. Ambulans a transportá shofùr di e bròmer den situashon di prekupashon pa poliklínika di SEHOS. Alrededor di 22.25 or Sentral di Polis a risibí informashon di poliklínika di SEHOS ku shofùr di e bròmer, e hòmber Shursy Leonel Shurnel Elias, nasé na Hulanda dia 14 febrüari 1991, a fayesé, a konsekuensia di e múltiple leshonnan ku e la sufri.
Personal di tráfiko ta kontinuá ku e investigashon.