Diabierna tabata un dia grandi pa SV Brazil Jrs unda cu nan a corona nan trabaonan intensivo den futbol Division Uno. Sr. Alonso Geerman presidente di SV Brazil Jrs ta splica.
Nan a hunga un campeonato practicamente invicto, y e disciplina di e hungadonan tabata un ehemplar pa tur ekiponan di Aruba. Un di e problemanan di Brazil Jrs ta transporte. Mayoria di hungadonan ta bin di barionan social y no tin transporte propio. Nan a pidi ayudo na diferente comerciante, pero diabierna TOPCAR NV/KIA MOTORS a sponsor e ekipo cu’n van pa asina yuda den transporte di e hungadonan, mas awo cu nan a subi pa Division Honor.
Brazil Jrs tin mas team ainda cu mester di ayudo. Brazil Jrs tin nuebe ekipo y 5 di nan a bay pa play-off. Pero nan ta sigui pidi yudansa di comerciantenan pa asina sigui yuda e otro ekiponan di Brazil Jrs, cu tambe ta den necesidad di un medio di transporte. TOPCAR NV/NISSAN a yuda Brazil Jr caba durante campeonato, cu uniform, tshirt, material,etc, pa cual Sr. Geerman ta sumamente agradecido. Y awo cu e Van, di parti di directiva, di parti di e team, e lidernan, e coachnan, nan ta sumamente gradecido, pa un dia asina grandi ya cu nan ta bira campeon di division Uno, tambe den U-13. Nan prestacion y nan maneho tambe a duna su fruto. Nan ta trahando ariba plannan pa futuro. Un deportista mas, ta un delincuente menos. Esey ta nan meta, y nan ta logrando esaki grandemente. Brazil Jrs ta consisti di mas o menos 180 miembro y nan tur lo sigui traha duro pa sigui progresa, segun Sr. Alonso Geerman, di directiva di SV Brazil Jrs.