Cultura ta bay man den man cu educacion

Dia 30 di september a celebra 40 aña di Servicio Cultural na Aruba, pa cual Sr. Siegfrid Dumfries ta relata con a recorda e hecho aki.

E celebracion a cuminsa cu un Santo Sacrificio di Misa na Misa Fatima na Dakota y tambe tabata tin un fiesta chikito pa e personal. Y den siman cu a pasa Departamento di Cultura a celebra hunto cu Cas di Cultura durante e C100 cu ta e celebracion unda ta pone e balor agrega di Arte di Tarima na Aruba y tambe duna splicacion y ehempel di kico tur por wordo haci cu arte. Durante e 40 añanan di cultura, tabata tin diferente cambionan pero tur cambio ta pa miho, segun Sr. Dumfries. Realmente ta trahando lo maximo cu nan tin pa cu tur nan partnernan cultural pa por sirbi pueblo di Aruba di un miho manera.

Rol di Departamento di Cultura den comunidad
Cultura ta bay man teni cu educacion, un pueblo acultura ta un pueblo educa y bon informa. Departamento di Cultura tin un tarea grandi hunto cu e sector di enseñansa, hunto cu e directiva di scolnan primario pa trece e parti di herencia cultural di Aruba na e scolnan. Ta trahando ariba esaki, nan tin un bon comunicacion cu Departamento di Enseñansa y Inspector di Enseñansa. Pero semper tin luga pa mehora pa haci’ e mas strategico y continuo. Tin diferente comisionnan cu ta traha ariba con pa introduci esaki na un manera continuo den enseñansa, ya cu ta solamente via di enseñansa por educa hende y trece historia y herencia cultural pa nos comunidad y mester cuminsa cu e muchanan.

Eynan Departamento di Cultura tin un rol hopi grandi eynan, y nan ta trahando cu e Ministerio di Enseñansa, pero por fortifica esaki, dun’e mas prioridad. Dun’e mas instrumento, mas doelcheck y mas personal disponibel pa asina pro laga e herencia cultura, tanto material y inmaterial y historico por biba mas cerca mas di e muchanan, treciendo cultura mas cerca di comunidad.
Mester cuminsa na educa y informa. Naturalmente semper mester di mas partner pa yuda carga esaki. En berdad, den e ultimo añanan tin diferente pakketnan cu ta bay scolnan primario. Na 2015 a cumpli 60 aña di nos escudo. Departamento di Cultura tabata tin full un proyecto di e splicacion di e escudo, kico e diferente symbool den e escudo ta nifica y con e escudo a wordo realisa. Tur e pakete di informacion aki, tanto di bandera y di himno, ta den un buki informativo cu ta wordo hiba e scolnan. Eynan mester cuminsa enfoca unda cu ta traha programanan di television na p.e. nos planta nacional, cu splicacion di himno, escudo y bandera. Tambe e historia su tras. Mester sigui informa, sigui educa y sigui fomenta. Esey ta e tarea di Departamento di Cultura, pero semper tin espacio pa haci esaki mas miho y mas structura. Ta habri pa esaki, conhuntamente cu enseñansa, y otro ministerionan pa haci esaki.

Tambe ta den combersacion cu Tele Aruba pa bin cu mas tempo of airtime, na manera di bisa, pa e sector cultural pa asina por informa y trece informacion corecto y legitimo den comunidad.
Ainda e proyecto Bon Bini Festival cu ta tur diamars na Fort Zoutman, cu ta den man di departamento pero cu a wordo traspasa pa Museo Historico, unda cu full e historia di Aruba for di tempo di colonalisacion ta wordo splica por medio di bailenan. Esey ta un plataforma cu por trece informacion corecto cerca e turistanan. Tambe e anochinan cultural na hotelnan, Departamento di Cultura tin un proyecto conhuntamente cu gruponan folklorico di Aruba, ta purba di bin cu’n structura pa tur haya chens di presenta den sector hotelero. Departamento di Cultura ta den combersacion cu ATA pa asina cu tempo por trece e informacion corecto. Pero e plataforma di Bon Bini Festival ta un ehempel concreto di con ta trece nos historia pa e turistanan y por amplia esaki tambe, por medio di trece e diferente e bailenan, e custumbernan, e historia pa diferente hotelnan. Eynan conhuntamente cu ATA lo trece anochinan local na tur hotel. Ta trahando esaki, e ta un proyecto andando pero mester concretisa esaki ainda, segun Sr. Siegrid Dumfries di Departamento di Cultura.

Comments

comments