E ley di kinderopvang ta conta pa esnan cu ta cuida mas cu 5 mucha y si un mayor kier laga su yiu un caminda, ta bon pa e lage un caminda cu sa cuida mucha segun, Natasha Gilkes, Pedagogisch Mederwerkster na Fundacion Pa Nos Muchanan.
Tin mayor cu ta scoge pa wak pa nan yiu na cas of ta laga e mucha cerca un wela of un welo of un otro persona cu e ta sinti su mes comodo pa lag’e cun’e. Esaki ta ok. Esaki por. Na momento cu bo ta cuida pa 5 mucha ariba, e ora e ley ta vigente cabo. E ora na e momento ey e ley di kinderopvang ta conta pabo y tin cu tene bo mes na e rekisitonan cu e ley ta trece dilanti.
E ley aki no ta conta pa 1 of 2 mucha. Gilkes a splica cu na momento cu tin 5 mucha bay ariba e ta conta pabo. Esey no ta kita afo cu si bo ta wak pa 3 of 4 mucha cu bo no por sigui cierto cursonan.
Semper ta bon pa haci esaki, pa eleva e manera con bo ta wak pa e muchanan cu bo ta cuidando p’e.
Na momento cu ta wak pa un grupo di mucha, na e edad di 6 siman pa 12 aña, e ora e ley ta conta pabo.
Semper e mayor ta keda finalmente responsabel pa unda e ta scoge pa laga su yiu. Pesey ta hopi importante pa como mayor, hasta den situacion unda cu ta bay scoge un centro, ta bon pa haci un bishita. Haci tur e preguntanan cu por tin, pa asina ta sigur cu bo ta lagando bo yiu na un luga cu pabo ta un luga di calidad. Y tambe tene contacto cu e personanan aki cu ta wak pa bo yiu, pa bo haya sa con ta bay cu bo yiu. Kico el a haci, si nan a observa algo, unda cu por ehempel e mucha tin mester di extra atencion ariba. Pesey ta importante pa e contacto entre mayor y e centro, ta hopi bon, ta hopi estrecho.