Durante un conferencia di prensa yama pa Cuerpo di Polis diabierna mainta, a duna di conoce riba nan evento di ACCP Conference Aruba 2017. Comisario di polis, Trudy Hassel a splica cu for di dia 1 pa dia 5 di Mei e conferencia aki lo tuma luga.
Hassel a splica cu Alto Comisario Richardson a encarg’e pa aña pasa pa organisa e conferencia aki, cual ta trata di un conferencia di e asociacion di tur e hefe di polisnan den Caribe y e aña aki, e tema cu a wordo scogi pa e conferencia aki, ta Globalisacion y Crimen organisa trans nacional. Esaki ta nifica cu ta bay purba den cinco dia di tempo pa por duna no solamente informacion na tur e polisnan Caribense riba diferente topico y e topiconan ta varia masha hopi mes di Crimen Organisa. Tambe e parti di Social Media, con pa uz’e den investigacionnan penal, pero tambe con pa proteha nos ciudadanonan den Caribe, mediante cooperacion entre tur e polisnan den Caribe pa asina garantisa toch cu ta keda un stap mas dilanti cu organisacionnan grandi trans nacional.
E aña aki a scoge pa pone e evento na Aruba Hilton, unda cu durante un siman lo bay tin mas of menos 18 workshop cu lo bay wordo duna pa expertonan internacional y e expertonan aki ta entre otro FBI, IRS di Merca, SSTC, CBSI, Omnisystem Tactical, AI Tactical, Motorolla Solutional, True North Law enforcement training group y asina por sigui menciona.
E hefe di polis di Ottawa di Canada tambe lo bay duna un presentacion. Di parti di Aruba, lo bay tin dos persona cu lo ta orador na e conferencia internacional aki cualnan ta sra. Jeanette Richardson-Baarhs, kende lo papia riba e topico di Traficacion di Hende y tambe sr. Juri Nicolaas, kende lo bay papia specificamente riba e topico principal cu ta transnational organized crime.
Durante e siman di e evento Hassel a splica ken tur lo bay tey na Aruba y kiko ta e importancia di nan presencia.
No lo bay tin solamente personanan policial, hefenan di polis na Aruba, nan ta bay wordo compaña pa nan casa, pero tambe alabes lo bay tin varios persona, VIP, cu ta bay bin internacionalmente, entre otro di Interpol y nan ta bay bin na Aruba pa asina por participa y duna nan contribucion na e organisacion di ACCP. Lo bay tin tambe e presidente di Caricom Impex. Di Inglatera lo bay tin personanan tambe presente. Lo bay tin hendenan di DEA entre otro. Esaki lo haci e conferencia aki uno di un magnitud internacional y di peso pa asina na Aruba tambe por contribui na upgrading di nos polisnan. Un parti hopi importante di e conferencia ta, cu lo cera hunto cu e cuerponan policial di Caribe, un protocol na unda cu ta bay palabra cu lo bay duna otro cooperacion riba e tereno di combatimento di organisacion di crimennan nacional y internacional.
Esaki ta un stap hopi grandi den e direccion di cooperacion pasobra ta kere cu e unico manera pa por combati crimen ta si uni forsa. Esey ta un di e basenan cu e conferencia na Aruba a wordo organisa.
E prome dia, Hassel a splica cu lo invita primeramente tur e hotelnan, High rise y Low rise, pa ta presente na e marcha di husticia cu lo tuma luga dia 1 di Mei mainta, riba e hotel strip di e high rise hotels, caminda cu lo tin participacion di diferente departamento y organisacion cu tur dia ta yuda Cuerpo Policial y ta traha estrechamente cu Cuerpo Policial, pa asina tur hunto ta duna siguridad na tur hende na Aruba.
Den e parada lo bay tin tambe cooperacion di fundacion Sonrisa, cual, hunto cu Cuerpo Policial y tur e diferente organisacionnan cu ta cana den e marcha, pa manda e mensahe di paz pa mundo completo segun Hassel. Esey ta nifica cu e simbolo ta blanco y durante full e conferencia, esey ta bay ta e simbolo di actividad.
Por ultimo, pa loke ta e tayernan, ta invita tur esnan di tur e departamentonan di Gobierno y tambe pafo, cu tin di haber directamente cu Cuerpo Policial y e lucha contra crimen organisa, pa por tuma contacto cu Cuerpo Policial, na Centro di Husticia na Santa Cruz, pa nan por inscribi na e diferente tayernan.
Banda di tur esaki, ta bay tin un exposicion di companianan internacional cu ta biniendo di afo, cu tur na productonan specialisa pa asina duna un epxosicion banda di e sala di conferencia na Hilton mes, pa asina nan por expone nan productonan y duna informacion locual cu ta hopi importante, riba tur e desaroyonan internacional cu tin actualmente, riba tereno di digitalisacion, riba tereno di informacion.
Comisario Hassell ta sigui splica cu no ta descarta social media, con esaki por wordo uza pa investigacionnan penal.
Ta invit tur hende cu ta interesa, tur e companianan cu ta interesa pa participa, pa haci’e lihe, pasobra e interes internacional ta hopi grandi pa bin Aruba. Mientras tanto hopi compania a reserva hotel y ta na caminda. Ta di spera cu di parti di Aruba tambe, companianan lo sa di saca cara di Aruba pa esaki.