Algun bario a cuminsa bini cu borchi di bario watch via nan sistema di whatsapp pa cual cuerpo di polis ta haya esaki hopi importante pa hasi segun Sr. Jhon Larmonie.
E idea di Neighbourwatch ta un iniciativa pa aplaudi, unda cu pa varios aña caba ta Cuerpo Policial ta bin ta promove pa e bario cuminsa tuma su siguridad un poco den su man. Pero Cuerpo Policial toch lo keda e punto principal pa siguridad den barionan.
Tin varios ehempel di Neighbourhoodwatch cu a lanta na Aruba y por mira e diferencia, unda cu a bira basta mas keto y otro barionan e cifranan a keda mesun cos. Cuerpo Policial ta stimulando pa bini hunto, pa cuminsa cu formanan di Neighbourhood watch. Aruba compara cu otro paisnan, ta basta trankilo toch. No ta bay haya Neighbourhoodwatch fuerte manera barionan unda cu tin gangnan cu ta cana rond den grupo grandi anochi. Pero mester cuminsa si, al menos cu e formanan mas minimo cu ta e contacto cu bisiñanan. E whatsappgroup ta dunando hopi bon resultado. Bisiñanan no ta biba tur ora pafo, pero si un bisiña cu ta yegando of saliendo, of ta pafo e mira algo straño, mesora e manda un whatsapp full e bario ta bin afo. A comproba casonan unda cu hendenan ta haciendo algo straño den bario y nan hala atencion, nan ta move for di e bario.
Cuerpo Policial ta acudi, ora di haya peticion di e barionan, ta papia cu e habitantenan di e bario. Ta dunanan lezing over siguridad na cas ya cu ta cuminsa na cas prome. Ta duna tipsnan con pa mehora cu otro, y kico ta e cosnan cu bo tin cu paga tino ariba dje. Kico si, y kico no. Un biaha mas ta trahando pa preveni crimen y crimen no ta algo pa haci wega cun’e. Cuerpo Policial ta esunnan getrain pa deal cu criminalnan. No bay haci algo ariba bo mes, pero tuma contacto cu Cuerpo Policial, ya cu e bisiñanan ta e wowo y e oreanan di Cuerpo Policial.
Tin hopi polis den algun bario tambe ta forma parti di e bario watch pa asina juda ora haya un yamada, Sr. Larmonie a sigui splica. Si por sigui bin cu iniciativanan asina, y unda cu por Cuerpo Policial ta cla pa yuda tambe. E Neighbourhoodwatch tin un efecto preventivo. No tur malhechor cu wak’e ta core drenta, pero ta bira mas consciente cu aki tin peliger. Niun malhechor no kier bay cera. Nan sa cu confrontacion cu violencia, e por haci daño na e miembronan di bario, pero na nan mes tambe.
Pero cualkier iniciativa cu bin, cu ta mustra cu hendenan den bario ta alerta y ta consciente di e peliger y ta trahando hunto, tin un efecto positivo ariba comunidad. Un di e promenan cu Sr. Larmonie lo conseha si kier bin cu Neighbourhoodwatch, por djis google y busca e informacionnan. Tin masha hopi Neighbourhoodwatch den varios otro pais, cu ta existi pa hopi aña. Nan ta boluntarionan, y tin hende cu a lanta Neighbourhoodwatch ya 30 aña pasa y ta amigonan di Aruba. Ora cu nan bin di bishita, nan ta duna lezing na personana interesa, kico ta loke ta haci cu e neighbourhoodwatch por perdura. Tambe por haya informacion online. Cuerpo Policial, su departamento di Crime Prevention, tambe por duna algun tips.
Cierto gruponan ta lanta whatsappgroup y despues di tempo ta haci e fout di manda informacion rond, di nada cu tin di haber cu e Neighbourhoodwatch. Esey ta irita hopi hende den e grupo y ta sali for di e grupo. Si ta lanta un whatsappgroup, specialmente pa Neighbourhoodwatch, mantene e informacion cu tin di haber cu esey. Mantene esey y e hendenan lo keda alerta tambe.
Cuerpo Policial tambe ta duna refreshment lecture, over di Woninginbraak y duna tips di con pa anda cu e Neighbourhoodwatch. Despues di un aña nan ta wordo pidi pa bay bek, y ta purba di duna informacion nobo, y ta papia over di atraconan na cas, con pa evita di bira un target di atraco na cas. Gruponan cu ta lanta awo, pro tuma contacto cu Sr. Larmonie, riba celnr. 597-5212 y ta traha un afspraak.
Basicamente Cuerpo Policial ta sigui duna informacion pa yuda educa comunidad, y esey ta un di e toolsnan hopi util cu Cuerpo Policial ta uzando di e arsenal cu nan tin contra crimen, segun Sr. John Larmonie, di Cuerpo Policial.