“Nos tin un Cuerpo Policial cu ta responde mesora riba cualkier acto criminal, nan ta traha hopi duro, nan ta traha na un forma profesional y ta logra soluciona casonan complica”, asina Minister mr. Drs. Arthur Dowers a duna di conoce diasabra marduga, un rato despues cu Ministerio Publico y Cuerpo Policial a anuncia cu e dos sospechosonan principal di e caso di homicidio na Wayaca ta deteni. E mandatario tabata masha pendiente di e investigacion y tabata ricibi “update” diariamente di e ekipo di recherche.
E ta lamenta cu specialmente for di oposicion, encabesa pa partido MEP, a inventa un sin fin di teorianan di kico lo por a pasa e dia di e crimen y a hasta acusa e Minister di ta culpabel pa e tipo di susedido nan asina. Awor cu e investigacion a yega asina leu cu detencionnan a cuminsa cay, por mira cu mayoria di e teorianan y puntamento di dede no ta cuadra.
Minister Dowers a subraya cu banda di e trabou represivo di parti di Ministerio Publico y Polis, ta haci hopi esfuerso riba prevencion. Asina mes, lamentablemente, ta nota cu mescos den tur sociedad, crimen ta sosode y ta haci dificil pa preveni 100%. E mandatario a enfatisa cu cada caso ta siña autoridadnan algo nobo, ta analisa casonan individual y ta adapta maneho den luz pa preveni ripiticion.
Minister Dowers a lamenta cu, durante e periodo di investigacion, un grupo di hende a purba capitalisa riba e angustia cu tabatin den comunidad despues di e crimen. A fabrica diferente atraco y purba simula un situacion for di control riba nos isla, pa sembra panico innecesario.
Di otro banda ta un realidad cu desaroyonan den e mundo di awendia ta haci cu como ciudadano nos mester ta mas atento pasobra tin hende ta bin nos isla y drenta como turista pero cu tin intencionnan menos bon. Tambe nos tin un realidad di hobennan cu a lanta bou circunstancianan dificil den nan nucleo familiar cu ta forma un risico pa comunidad. Gobierno ta convenci cu si mas hende cera cabes, cu hunto nos por minimalisa e riesgonan.
Minister di Husticia a bisa na final cu, for di prome momento cu e caso aki a tuma luga, el a bay na e sitio y e prome impresion di e Hefe di Polis, cu pa casualidad ta un criminologo tambe, mescos tabata e hefe di atraco team kende ta un recherche masha cu hopi experencia, cu for di un prome instante a sinti cu e caso ta straño y no ta cuadra cu e scenario cu a haya na e sitio. Pero awor tur hende ta compronde miho dicon mester a keda keto y duna autoridadnan e espacio pa conduci un investigacion riguroso.
Minister Dowers tin palabranan di gradicimento pa e ekipo di recherchenan cu a conduci e investigacion, pa e oranan y sacrificionan hinca den e caso y tambe ta pidi comunidad pa sigui sostene Polis y husticia den e lucha pa preveni criminalidad. “Ta dor di traha hunto, husticia y comunidad por percura pa tene e pais aki mas sigur pa nos tur”, asina e Minister di Husticia di nos pais a termina bisando.