Durante di fin di siman tabatin accion di preventief fouilleren di parti di Cuerpo Policial y Ministerio Publico den diferente districto. E districto di Noord a publica nan resultadonan mas tempran e siman aki caba.
Districto di Oranjestad y Santa Cruz tambe a uni na e accion aki. E accionnan a tuma luga for di 6or di atardi pa 6or di mainta, riba diabierna atardi pa diasabra mainta, y riba diasabra atardi pa diadomingo mainta.
Durante di anochi di dia 28/29 di October den districto di Oranjestad polisnan a controla 175 auto, y a skirbi 42 procesverbaal; a haya tres persona – incluyendo un chauffeur di taxi, coriendo bao di influencia di bebidanan alcoholico.
Ademas a topa cu un caso di buracheria publico, esta “openbare dronkenschap”, a detene dos persona cu tabata falta nan documentonan valido di estadia, y a controla Cas Casuela, Tipsy, Moonshine, Roxdann, Euphoria, Sandra’s Garden y Hamaka.
Miemrbonan di Cuerpo Policial a “fouilleer” diferente grupo di persona na Circle K, Moonlight, Budweiser Bar y Euphoria.
Riba e anochi di October 29/30, Cuerpo Policial a para 254 auto, y a parti 52 procesverbaal. E anochi aki no a haya ningun tras di stuur coriendo bao di influencia di bebidanan alcoholico.
Un funcionario di douane a keda deteni pa obstrui trabao di polis, y dos persona a keda deteni en conexion cu e ley di estadia legal, como cu nan no por a mustra documentonan pa prueba cu nan ta legal na Aruba.
Un biaha mas Cuerpo Policial a controla luganan conoci pa actividadnan anochi, manera Cas Casuela, Tipsy, Moonshine, Roxdann, Euphoria, Sandra’s Garden y Hamaka. E negoshi Bar a Bara a wordo cera pa autoridadnan pa falta di e permisonan necesario.
Polisnan un biaha mas a “fouilleer” personanan para p’afo di Circle K y Budweiser Bar.
Durante e accionnan aki a conta tambe cu e participacion di coleganan di e unidad motorisa di Cuerpo Policial, kende awo ta conta cu cuater colega nobo. E team di brommer di polis a detene 15 persona, di cual shete di nan a perde nan rijbewijs.
A takel tambe shete auto y tres brommer, y tur lo ricibi procesverbaal pa falta di prueba di seguro valido y pago di plaatchi di number.
E unidad aki tambe a controla mas of menos 200 auto.
E team cu a traha den e districto di Santa Cruz hunto cu Cuerpo di Bombero a controla varios supermercado riba dia 29 di October, cuminsando for di 4’or di atardi pa 12’or di anochi.
Ni un di e supermercado/mini marketnan tabata cumpli cu e rekisitonan pa loke ta trata e condicionnan di nan vergunning pa bende bebidanan cu ta contene alcohol, tambe tabatin falta di cumplimento pa cu siguridad di candela.
Esunnan cu no ta cumpli cu e condicionnan pa siguridad den caso di candela, a haya dos siman pa drecha tur loke falta. Despues cu e 14 dianan transcuri polis y brandweer lo bishita e negoshinan aki atrobe.
Durante di nan controlnan, polis a bishita Sabana Grandi Snack. E negoshi tin un vergunning pa bende cerbes, pero tabata bendiendo bebidanan sterki tambe y consecuentemente e bebidanan sterki a keda tuma den beslag y e doñonan di e negoshi a ricibi un procesverbaal
Cu accionnan manera esunnan di e fin di siman druk di fin di luna, y Halloween, Cuerpo Policial ta traha preventivo, proactivo y efectivo pa cu siguridad personal di e ciudadano y ta logra frustra esunnan cu tin intencion di bay comete actonan ilegal y daño, contra un persona, un negoshi y na casnan.