Cuerpo Policial Aruba a ta manehador di e cartera pa cu “ondermijning” den region Caribense.
Esaki a keda acorda algun siman pasa den College van Korpschefs , Ministerio di Husticia y Seguridad di Hulanda, y e diferente paisnan Caribense den region, como tambe Nederlandse Nationale Politie. E College van Korpschefs ta un colaboracion entre altocomisario di Aruba, Corsow, Sint Maarten y e BES (Boneiro, Sint Eustatius y Saba). E College van Korpschef aki ta traha intensivamente hunto riba diferente temanan di seguridad y desaroyonan den organisacionnan.
Altocomisario di polis di Aruba drs. Ramon Arnhem, ta bisa cu “ondermijning” ta un concepto mane un recipiente, pero e ta basa riba criminalidad pisa y cu efectonan negativo riba e comunidad. Por ehempel, e hobennan vulnerabel cu den lugar di traha un trabou normal ta skohe pa traha den e baho mundo di droga pa asina gana suma grandi di placa ilegal. Pero e consecuencia di “ondermijning” tambe ta mire den maltrato severo y corrupcion den diferente departamentonan di gobierno.
Pa combatimento di e criminalidad pisa, ta solamente posibel den un bon colaboracion cu otro partnersnan paden y pafo di e cadena di seguridad (Veiligheidsketen). Pero comunidad tambe ta hunga un papel importante.
“Criminalnan ta bira mas sabi y ta traha bon hunto, pasando frontera di e pais. Nos mester ta un paso mas dilanti. Esaki ta dor di traha bon cu diferente partner local y internacional”, ta palabra di altocomisario Arnhem.
