Cuerpo Policial Aruba ta aclaria: No a uza ekipo di K9 di Polis durante razzia den KIA

Den fin di siman un preso a saca potret di su djiente kibra y a mande pa corant, kehando maltrato di Polisnan di e ekipo K9 cu a tene un razzia diaranson ultimo den e instituto coreccional. “Pero nos kier aclaria cu Polis no a participa den e razzia aki. KIA tin su propio ekipo di K9 cu nan ta uza pa tipo di trabounan asina”, tabata palabranan di Lito Lacle, vocero di Cuerpo Policial Aruba.

Ta importante pa aclaria e asunto aki mesora pa no crea un impresion cu Polisnan a drenta KIA pa tene razzia y cu lo a abusa di un preso.

Hecho ta cu a base regular ta tene razzia den prizon, pa purba mantene e luga mas sigur posibel. Si mira cu presonan mes ta saca potret via celular y manda pa prensa mes ta un motibo dicon ta importante tene e tipo di razzianan asina cu regularidad.

Ta conoci cu KIA tin un comision special cu ta atende cu kehonan di preso relaciona cu uzo di forsa excesivo. Den e caso specifico aki, e ekipo di K9 di KIA a traha nan rapport caba y a entrege na nan director, den cual a splica kico a sososde.

Ta bon pa splica cu na Aruba autoridadnan ta conta cu tres diferente ekipo di K9, un di Polis, un di Douane y un di KIA. Tur ta traha den nan area y ta uza e ekiponan aki na momento cu e situacion of circunstancia ta rekeri.

Comments

comments