Sr. Allan Howell, miembro di parlamento pa partido POR, a felicita Cuerp Especial Aruba pa cu e celebracion di 15 aña di existencia.
E ta un cuerpo cu su persona mes a mir’e lanta, tempo cu e tabata den Cuerpo Policial mas di 15 aña pasa. E tabata un cuerpo cu hopi hende tabata tin pregunta ariba dje, pa puntra con e ta bay funciona, con e ta bay draai. Pero e Cuerpo aki a gana nan respet cerca nan ciudadano y esaki a pone cu e cuerpo tin e respaldo di gobierno, parlamento y tambe di pueblo. Sr. Howell kier a manda un pabien na cada un colega cu ta haci cu CEA tin e respet den comunidad, pa dunanan sabidura, salud pa nan sigui traha pa hiba Aruba dilanti.
Cuerpo Especial Arubano ta un departamento cu tin hopi takinan pa yuda diferente caminda, esencial aki na Aruba y nan ta haciendo un tremendo trabao na KIA, na OM y hasta na Bestuurskantoor, caminda cu nan ta trece un siguridad hopi importante pa nos ciudadano. Pero tambe nan ta keda un departamento cu tin hopi reto, door di falta di personal y ekipo, y door di esaki e tin atencion extra di Sr. Howell, ya cu e tin di haber cu husticia.
E compania aki tambe tin su fayonan, caminda cu mescos cu KIA, tin hopi ‘ziektemelding’. Si nan haya mas personal, nan lo por haci un miho trabao. Loke parlamento ta enfoca hopi ariba dje, ta pa e para tras di minister di husticia, pa zorg pa e bewakernan aki haya nan opleiding debido, cu nan bira un ‘Buitengewone Agent van Politie’, cu por yuda tareanan di Cuerpo Policial, vooral ora di Carnaval, y nan por yuda den hopi aspecto, haciendo e trabao mas facil pa Cuerpo Policial y tambe pa nos pais Aruba. Asina Sr. Allan Howell a termina bisando.