Na Colegio EPB San Nicolas a tuma lugar un Lezing cu participacion special di Cuerpo di Polis Aruba (KPA). Vocero di Polis, John Larmonie a splica cu KPA a wordo invita door di directiva di Colegio EPB San Nicolas pasobra nan ta bay tin un carousel cu yama “Bo Imagen Bo escogencia”.
A pidi Cuerpo Policial pa papia riba e escogencianan cu e hobennan ta haci. KPA a scoge e tema aki y tambe a incorpora e tema di “gang” ya cu e bida den gang ta un bida hopi violento. E ta semper relaciona cu arma, droga y hopi problema, Larmonie a subraya.
Na Aruba e problematica di gang tey y pesey KPA a scoge pa papia riba e topico aki y acerca nan for di un edad hopi hoben, siña nan kico ta e realidad y e tipo di bida aki, a bisa.
Segun John Larmonie, violencia ta causando hopi problema ariba nos isla. KPA ta contento cu e reaccion di e studiantenan tabata hopi positivo y cu e docentenan ta duna Polis bon feedback. Ademas, Polis ta haya critica constructivo y nan ta acepta esaki y nan ta aplica esaki tambe den nan lezingnan.
E meta di KPA ta pa alcanza mas hopi hoben posibel. No kier warda te ora un problema bay for di man, pero e ora mester bay wak con ta bay coregi esaki. Lo keda pone enfasis riba e aspecto preventivo pa evita cu hobennan ta bay den un manera di biba cu mañan lo causa problema pa nan mes, nan famia y henter e comunidad, e vocero di Cuerpo di Polis, John Larmonie a duna di conoce.