Relaciona cu e ultimo dianan di aña, caminda cu sigur sigur hopi klapchi ta wordo tira, Sr. Ferdinand Ponson, vocero di Cuerpo di Bombero ta haci apelacion pa ta mas consciente ora di tira klapchi.
Esunnan cu ta tira vuurwerk mester tene cuenta cu auto ta pasa ariba caminda. No bay tira klapchi ariba caminda net ora cu auto ta pasa. Esaki ta forma peliger pa e chauffeur. Ora cu bay tira klapchi, tene cuenta cu siguridad, uza mecha largo manera semper ta bisa. No uza zwafel, no uza mecha chikito, sigaria of plagatox. Pero echt uza un mecha largo cu a wordo traha specialmente pa cende vuurwerk.
Pa loke ta paden di cas, esaki ta e temporada cu tur hende ta cushina pa fin di aña. Pero tambe ta temporada pa tin mas control ariba cushina. Sea atento ora ta den cushina, pa gai cora no canta. Ban sea consciente ariba siguridad tanto paden como pafo di cas, segun Sr. Ferdinad Ponson, vocero di Cuerpo di Bombero.