Cuerpo di Bombero ta bayendo bon den e reunionnan cu a pasa durante full aña. Nan tabata tin mas of menos 6 pa 7 reunion cu Vuurwerk Commissie, hunto cu e importadornan, segun Ferdinand Ponson, Vocero di Cuerpo di Bomero.
A sinta papia cu nan. A papia cu e bendedonan tambe. Tur e acuerdonan ta poni riba mesa. Tin diferente combersacion cu nan ta percura pa wanta na dje durante e temporada di control y e yegada di vuurwerk tambe.
Aña pasa tabata tin hopi kibramento di regla. Ponson a splica cu entre otro tabata tin un luga cu a haya vuurwerk warda ilegal. A tuma medida contra di dje. E aña aki tambe e no ta cay na remarca pa e por bende. Tin luganan cu no a tene cuenta cu diferente regla, sea di DTI, DOW of di Brandweer mes y polis y a tuma medida aña pasa door di cera nan luga. E aña aki lo ta mesun streng y mantene e reglanan straight.
Klapchi legalmente ta drenta door di pedido cu nan haci via Brandweer, cu DOW. Expertonan ta duna nan advies di dje y asina cu nan bisa cu e ta wordo goedgekeurd of no, e ora e mester pasa. Tin luga cu ta tira vuurwerk ilegal cu ta drenta y ta purbando di wak con ta haci pa haya sa con nan ta drentando nan y si haya nan, e ta wordo confisca y tin medida ta wordo tuma contra di nan di inmediato.
Esaki ta castigabel den e sentido cu nan ta kita tur cos for di nan y pa e siguiente aña nan tin chens cu nan no mag di importa, tira of bende, depende di e Comision di Vuurwerk.
Ponson a splica cu tin casi mesun cantidad cu aña pasa. Ta trata di mas of menos 83 luga. Diferencia di dje ta cu tin hende nobo cu a bin acerca. Pero esnan cu ta trece por mayor a crece un tiki mas e aña aki.
Ponson a sigui splica cu segun ta bay wak cada aña, ta wak y ta haya e chikitonan cu tin cu ainda por, cu ta polish e structura y ta pone reglanan di manera cu e ta bira mas straight y mas sigur pa e cumprado y uzadonan di klap tambe.