Cuerpo di Bombero un biaha mas ta celebra Dia di Bombero, cual ta un dia cu ta refleha ariba un aña cu a pasa y e trabaonan cu e bomberonan a desplega. Comandante di Cuerpo di Bombero, Sr. Eduard de Cuba, cu e relato.
E dedicacion cu nan tin pa e pueblo di Aruba y e sacrificio cu nan a haci nan mes. Hunto cu e sacrificio pa cu nan famia, pa cumpli cu nan trabao, pa cumpli cu e pueblo di Aruba. Bomberonan a bin hunto pa gradici Dios pa nan t’ey pa nan por sigui haci nan trabao, ya cu ta sali di nan curason pa sigui cumpli cu nan trabao.
E aña aki un biaha mas ta purba conscientisa e pueblo ariba e peliger di candela. Hopi hende ta na cas ta pone un aparato ariba un charger, lag’e charge durante dia of anochi. Y esey ta un descuido cu lamentablemente si ta hay’e demasiado biaha. Esey ta e causa di un candela inespera. Un accident cu a pasa den un camber, den un sala, na un cas, cu e por a wordo evita.
E ta algo cu a bira asina un custumber, un parti di nos bida, cu hopi ta kere cu e peliger no t’ey. Esey toch Cuerpo di Bombero ta purba conscientisa pa wanta atencion na dje. E tin algo toch cu tin su risiconan y pa keda pendiente di algo asina.
Ariba e Dia di Bombero, nan ta purba di amplia mas internamente, cerca nan mes, pa refleha un rato pa bisa cu nan t’ey y cu nan lo sigui y cu nan ta orguyoso di nan coleganan y e trabao cu nan tin pa haci.
Mirando cu Aruba ta creciendo hopi lihe, Cuerpo Di Bombero ta adapta su mes na esey y e personal tambe ta adaptando su mes na dje. Aruba ta bayendo dilanti, pero e risicobeeld di Aruba ta birando mas pisa, pero esey not a kita afo cu ta preparando pe.
Cuerpo di Bombero a entrega un plan di maneho cerca minister y gobierno pa un mehora pa loke ta material y tambe pa amplia e Cuerpo di Bombero mes, pa asina por duna cabes na tur e retonan cu tin nan dilanti. Esey no kiermen cu Cuerpo di Bombero ta mal para, nan ta fragil, esey Sr. de Cuba ta admiti. Pero cu e empeño di e trahado, por bisa cu nan ta logrando cu e trabaonan. Y ta spera cu por logra den un corto tempo, cu por logra no solamente material y personal, pero tambe cu e persona cu ta sinta aworaki, pa nan sigui upgrade y sigui brinda e servicio cu Cuerpo di Bombero ta duna.