“Nos a percura pa activa tur Bombero na Aruba, cu excepcion di esunnan cu vakantie den exterior. Hasta esunnan cu vakantie na Aruba a raporta na kazerne pa duna un man”, asina Ferdinand Ponson di Cuerpo di Bombero a duna di conoce. E ta referi na e fin di siman den cual a spera mal tempo riba nos isla.
Cuerpo di Bombero tin nos isla parti den tres y ta maneha for di su 3 kazernenan, di cual un ta situa na San Nicolas, otro na Aeropuerto y e otro na Tanki Flip. A percura pa tin maximo cantidad di Bombero riba warda durante diahuebs y diabierna pa por brinda asistencia unda ta necesario.
Asina por menciona cu entre diahuebs for di 3:00pm te diabierna 3:00pm a atende 21 melding y entre diabierna pa diasabra a atende 8 caso mas pa completa 29 asistencia den total. Entre e asistencianan a atende un auto y un cas na candela, 4 hulpverlening y tur otro tabata molester di awasero cu a yena den cura di cas of edificio.
Cuerpo di Bombero tabatin su mesun pompnan cu a uza unda tabata necesario. Pero, nan por a conta riba pompnan extra di DOW y companianan priva cu a reserva nan pompnan pa nan, si acaso a yega na un extremo asina. Pero, nada di esey tabata necesario. Diasabra, despues cu e horcan pasa caba, Cuerpo di Bombero a activa y a sostene DOW cu su pomp na altura di Sasakiweg, como cu e caminda a bay completamente bou di awa. Esaki como un sosten pa yuda e capacidad di e pomp di Divi Links, debi na e cantidad di awa cu a acumula eybanda.
Cuerpo di Bombero tabatin 6 Bombero riba cada warda na San Nicolas, 10 na Aeropuerto y 6 na Tanki Flip, mas un Officier van Dienst. Den Alarm Centrale tabatin 4 Centralista trahando pa cada warda, mientras cu e aumenta e wardanan pa 12 ora sigui en bes di 8 ora. Na tur tabatin 26 Bombero riba cada warda, 7 Bombero ‘stand by’ y 12 na cas pendiente via nan pager.
Cuerpo di Bombero Aruba ta existi desde aña 1976, como un departamento independiente. Prome cu esey e tabata parti di e trabounan di Polis. Awendia e ta conta cu 160 empleado, di cual 112 ta traha activamente cu combatimento di candela. E empleadonan ta parti den 3 diferente post, situa na San Nicolas, na Aeropuerto y na Tanki Flip. Pa aña nan ta responde na mas o menos 1600 melding, cu ta varia entre combatimento di candela, rescate, yudansa special y trabounan na aeropuerto.