Gobierno Cubano a cuminsa vacuna muchanan di apenas dos aña, contra COVID-19, asina por a lesa den prensa estatal di e pais. Esaki cu e meta pa e muchanan por cuminsa asisti na scol atrobe.
Awe scol lo mester a habri na Cuba, pero a cancela apertura debi cu e cantidad di casonan di coronavirus a aumenta na Cuba.
Aunke cu otro paisnan a bisa cu nan lo vacuna e muchanan, ta calcula cu Cuba ta e prome pa duna e vacuna contra coronavirus na e muchanan chikito.
En bes di bay scol, e muchanan ta mira programa educativo na television durante oranan di scol tur dia. Internet na cas no ta algo normal riba e isla dirigi pa e Partido Comunista. Mayoria di e lesnan presencial a wordo para durante e pandemia.
E vacunacion di muchanan a cuminsa for di luna di augustus ultimo. E luna aki, Cuba a informa cu nan vacunanan ta sigur pa muchanan di dos aña.
Na inicio di e pandemia, e funcionarionan Cubano a anuncia cu nan lo traha den creacion di nan mesun vacuna, en bes di depende di otro paisnan pa haya nan remedinan.
E cientificonan Cubano ta bisa cu nan vacunanan fabrica na Cuba ta sigur y efectivo, pero te na e momentonan aki a duna poco dato pa e observadornan externo. E pais a informa tambe cu nan lo busca aprobacion di OMS pa nan vacunanan.
Te cu aworaki, segun Ministerio di Salud di Cuba, mas cu cuatro miyon di persona a haya ambos dosis di e vacuna. Gobierno ta spera di vacuna mas cu 90% di e poblacion di 11.2 miyon di persona prome cu nan habri nan frontera internacional memey di november. Nan a registra te cu awo 6.056 fayecido a causa di coronavirus.
MERCA
Di otro banda, fundadonan di e compania biofarmaceutico Aleman BioNTech, hunto cu e farmaceutico Mericano Pfizer, desaroyadonan di un di e vacunanan contra COVID-19, tambe tin noticia positivo. Nan ta conta cu nan por duna nan vacuna entrante otro luna na menornan di entre cinco y diesun aña.
“Ya den e proximo simannan nos lo presenta na autoridadnan di henter mundo e resultadonan di nos estudio pa loke ta menornan di entre cinco y diesun aña. Y nos lo pidi autorisacion di e vacuna pa e grupo di edad aki, tambe pa Europa,” co-fundador di BioNTech, Özlem Türeci a bisa.
Ya caba ta preparando e produccion y cu e vacuna lo ta e mesun, pero cu un dosificacion menor pa muchanan.
Y pa luna di november lo tin disponibel e datonan di estudio relaciona cu menornan di seis luna bieu bay ariba.
Comision Permanente di Vacunacion (Stiko) di Alemania a recomenda di forma general e vacuna contra COVID-19 cuminsando cu 12 aña for di memey di augustus caba. Prome cu esey e recomendacion tabata solamente pa muchanan di 12 aña cu malesa y for di 16 aña bay ariba.