Diabierna den oranan di madruga a tene un entrada hudicial den Caya St. Maarten. A haci uzo di team di Aresto, Unidad di K-9 y polis uniforma di San Nicolas.
Ta trata di un caso di tiramento cu a tuma lugar diadomingo 21 juni 2026 dilanti Pacifico Restaurant na San Nicolas. E dia encuestion pa mas o menos 3:55 di atardi central di polis ta despacha patruya di polis di San Nicolas na altura di Pacifico Restaurant pa un caso di tiramento. Lo mester tin dos auto envolvi den e caso aki. Ta trata di un Nissan March color blauw y un Toyota Altezza color shinishi. Na yegada di polis no a encontra e autonan mas e lugar di e sucedido. Polis a controla rond y ta bin topa cu hulsnan pero tambe perforacion di bala.
Diferente unidad di polis a cuminsa busca den e cayanan rond pa wak si por topa cu e sospechosonan. Un rato despues den Caya Bonaire, polis ta bin topa cu e auto Altezza color shinishi para sin niun hende den dje. E auto a wordo confisca pa cu e investigacion.
Departamento di recherche di San Nicolas a sigi cu e investigacion trahando incansabelmente y awe madruga a pone man riba 3 sospechoso. Ta trata di e hombernan: D.R naci na Aruba di 27 aña, L.T.D. naci na Aruba di 23 aña y K.R. naci na Aruba di 18 aña.
Despues den oranan di merdia e otro sospechoso, hende homber, busca pa cu e caso aki a presenta na warda di polis San Nicolas y a entrega su mes. Ta trata di M.P.Y. naci na Aruba di 17 aña.
Cuerpo Policial Aruba ta haci un apelacion na esnan cu sa algo of a wak algo pa yama e tiplijn di polis cu ta 11141. Bo ta keda anonimo.