SAN JOSE, Costa Rica – Un despedida di soltera na Costa Rica a termina den tragedia despues di cu cuater turista procedente di Miami a perde nan bida, segun Telemundo 51 a informa.
E Organisacion di Investigacion Hudicial (OIJ) a identifica e fayecidonan como Ernesto Sierra, Jorge Caso, Sergio Lorenzo y Andrés Dennis. Tur di nan tabata tin di entre 22 pa 35 aña di edad. E guia local Kevin Thompson Reid tambe a perde su bida den e tragedia aki.
Nan tur a muri despues di a sufri un accidente di rafting den e riu Naranjo. E suceso a tuma luga diasabra pa 3 or di atardi, ora cu e tres canoa nan a bolter.
E victimanan, cu a wordo lastra pa coriente, a yega e pais Centroamericano dia 18 di october ultimo. E sobrevivientenan tabata por a wanta na e canoanan y algun di nan a ricibi yudansa di e guianan.
E Comision di Emergencia Nacional tabata mantene un codigo geel den e zona unda cue accidente a tuma luga, door di e posibilidad di un aumento sorpresivo di e coriente. Den e sentido aki, ta sali for di e punto di bista cu e accidente a ta debi na e clima.
“Ora cu nos a yega pa prome biaha tabata tin hopi biento y awa tabata yobe. E guianan turistico a conseha pa nos warda un poco prome cu nos drenta e awa. Menos di un hora despues, nos a haya e autorisacion pa sali y 14 di nos a separa den 3 canoa diferente. Na di cinco minuut cu nos tabata den e awa, e tres canoanan a bolter y nos tur a bay awa”, un di e turistanan a relata.
“Nos tur a lucha pa keda ariba awa, nos a guli hopi awa. Mientras nos tabata bahando, nos curpanan tabata dal contra di e piedranan den awa. Mayoria di nos por a wanta na e piedranan. Pero lastimamente, no tur tabata tin e mesun suerte”, e ta lamenta.
Presidente di Costa Rica, Carlos Alvarado a mustra su “consternacion” pa e sucedido a trabes di su Twitter account.
Un di e sobrevivientenan a crea un campaña riba GoFundMe pa cubri e gastonan di repatriacion di e victimanan.