Diahuebs mainta cuater boto di kustwacht pa Aruba, esta e cuater Metal Sharknan a yega waf di Barcadera. Nan a wordo baha y cu yudansa y transporte di polis, nan a sali cu nan via e caminda di Barcadera te na Marinierskazerne na e steunpunt di Kustwacht. Eynan lo cuminsa cu e preparacionan pa baha e botonan ariba awa.
Manera ta conoci, ya caba Corsou ta dispone di cuater Metal Shark. Esaki ta botonan cu kustwacht lo usa cu ta mas of menos mesun tamaño cu e SuperRhibnan cu nan tin awor aki den funcion. E diferencia ta cu nan ta full cera. Awor aki cu mas siguridad y trankilidad, personal di kustwacht por haci nan trabao riba lama na momento cu nan ta sali pa cuida nos costanan y atende cu ilegalidad riba lama.
Sigur palabranan di pabien na e personal di kustwacht cu nan material nobo pa por sigui garantisa e siguridad di pueblo te hasta den oranan di anochi y den dia.