NEW YORK CITY, New York – Pa protehe e presidente electo Donald Trump y su famia ta costa e ciudad di New York mas di un miyon di dollar pa dia, segun tres funcionario di e ciudad ta indica.
Y e costonan ey no necesariamente lo reduci ora cu e muda pa Cas Blanco.
Ta debi cu ta spera cu Melania Trump y su yiu di 10 aña, Barron, ta keda den nan cas den Trump Tower na Manhattan, porlo menos te na final di e aña escolar. Y Donald Trump a indica cu e tin plan pa bin bek cas regularmente, specialmente ora cu su famia ainda ta biba eynan.
E balor tin cu suma na e costo di e polisnan asigna na e yiu y nietonan di Trump, kendenan tambe lo tin protession di Servicio Secreto, segun John Miller, vice comisionado di inteligencia y contraterorismo di e Departamento di Polis di New York, WCBS dialuna. Tur ta biba den e ciudad ey y tur tin derecho di ricibi proteccion di Servicio Secreto.
“E prioridad number un ta siguridad. Nos debe esey na e presidente electo, na su famia y su ekipo,” e alcalde di New York, Billd e Blasio a bisa den un conferencia di prensa diabierna. Pero De Blasio a bisa cu e ciudad tin mester di ayudo cu otro costo, particularmente e oranan extra di e polisnan.
“Esaki ta un sunto hopi substancial. E lo rekeri recursonan substancial,” el a bisa. “Nos lo cuminsa cu combersacion cu e Gobierno Federal pronto riba e reembolso pa e Departamento di Polis di New York pa algun di e costonan cu nos ta bezig ta gastando.”
Aunke e responsabilidad primario ta e proteccion di e presidente of e presidente electo, ta coresponde na Servicio Secreto y polis local ta encarga pa yuda nan, particularmente den e control di e movimientonan di e publico en general.
Cada presidente tin mester di proteccion policial ora cu e bin bek cas durante su periodonan di Gobierno. Pero proteha Trump na New York ta particularmente costoso, debi cu e ta biba den e bario mas densamente pobla di e ciudad di mas grandi di e pais.
“Nunca nos tabata tin un situacion cu e presidente di Merca ta akinan cu asina hopi frecuencia,” de Blasio a bisa. “E detayenan di su plannan futuro ta desconoci, pero ciertamente nos sa cu den e proximo 65 dianan (te ora di e posesion) e lo ta aki di forma frecuente. E departamento di Polis di New York por asumi e reto y e ciudad tambe, no mester tin duda di esey.”
E ciudad a busca y a ricibi reembolso pa proteha lidernan mundial den pasado, ora cu e hefenan di estado ta bishita nacionnan Uni, de Blasio a bisa. E registronan di e ciudad ta mustra cu el a ricibi 26 miyon dollar di placa bek pa e tipo di gastonan asina den 12 luna anterior cu a caba dia 30 di Juni of rond di 500 mil dollar pa siman.
Pero e hecho cu e ciudad tin cu proteha Trump frecuentemente ta algo sin precedente, De Blasio a bisa.
Fuente: CNN en Español