ATIA a duna su punto di bista ariba e aumento di 6% den varios ocasion. Un aumento semper ora e wordo introduci, di cualkier forma e ta haci e base di inflacion, e ta haci cosnan mas caro. Sr. Roland van Trikt, di ATIA ta amplia mas ariba esaki.
Por mira cu inflacion ta biniendo, mirando cu tin gruponan cu ta purbando di haya un aumento di prijs. Lo bay haya mas di esaki, ora cu otro aña e base di inflacion wordo calcula y door di un evento asina aki, bo ta haya mas presion. Trahadonan lo bisa cu cosnan a bira mas caro, e ciclo ta uno cu lo tin su consecuencianan.
Mas aleu, Sr. van Trikta sigui bisa cu na varios ocasion den diferente reunionnan cu Minister di Finanzas, mr. Xiomara Ruiz- Maduro. Tin varios asunto cu ATIA ta persistentemente comenta ariba dje, cual nan a combersa cu e mandatario y tambe Departamento di Impuesto. E preocupacion ta cu no ta tur hende ta paga. E companianan mas grandi, esunnan mas structura ta cay bou di e ley. Pero tin un gran parti di nos economia cu no ta contribui cu e ley aki.
Ora di introduci algo asina, mester compronde cu e ta algo pa hiba Aruba dilanti. Pero mester tin e confianza cu un base mas amplio ta contribui na dje. Ora tin un base chikito, cu por contribui na belasting. Pueblo ta contribui pero e no ta wordo duna na gobierno. Semper ta keda cu no por saca e maximo for di un ley. Esaki lo tin atencion di gobierno, pero esaki semper ta keda preocupante.
Ta dificil pa wak delante kico ta bay pasa, pero e aumento di BBO/BAZV lo pone cu prijsnan lo subi. ATIA ainda no a haya oportunidad di reuni cu e Asociacion di Seguro, cu nan si lo mester aumenta nan premienan, basa ariba seguro di auto y seguro di cas, etc. E efecto di e introduccion aki, ta mas amplio di loke a premira ora cu el a wordo anuncia.
Tambe tin e discusion di cu tin un otro tipo di belasting, cual ta e Omzetbelasting di 9%. Ley di belasting ta algo cu mester traha riba dje. ATIA ta concentra fuerte ariba un cambio den nos sistema di belasting, cu ta haci’e mas facil. Pero tambe lo preveni cu mucho hende ta cay bou di e radar di pagamento di belasting. E no pagamento di belasting ta bay mas leu, e ta cay tambe Loonbelasting, AOV. Tur belasting mester wordo entrega na gobierno, gobierno mester haya su fair share.
Esaki ta algo cu semper ATIA ta deal cun’e, tur hende ta pagando y esun cu no ta paga, kico ta e consecuencianan. Ora cu tin consecuencia bo ta crea un level playing field ariba Aruba, unda cu por haci negoshi.
Consecuencia ta si, cu e lo tin su efecto ariba cierto prijsnan. Panaderonan ta pidiendo caba pa aumento di prijs. Locual ta bon den e reunionnan, ta e comunicacion ya cu esaki ta hopi importante. Durante e reunionnan por a ripara cu tabata tin hopi speculacionnan cu tabata tuma luga, cual a wordo bari for di mesa di biaha, manera p.e. Prijs di dollar. Como comercio, como tur hende, nos tin responsabiliidad, pa tin confianza den futuro den cual nos ta bayendo. ATIA a expresa esaki tambe na minister. Tin biaha ta yega tempo unda cu cos ta bira un poco mas preta, gastonan ta subiendo.
Pa locual ta bahamento di gastonan di gobierno, mirando e rapport di CAft, cu ta bin cu condicionnan masha stricto mes pa gobierno baha gasto. Esaki ta un punto cu ATIA lo kier papia ariba dje, y comercio lo por contribui pa cu esaki.
Ta facil pa bisa pa kita 1000 hende, pa 1500 hende for di trabao. Esey ta 1000 pa 1500 consumidor menos, y al final nan bira un peso pa gobierno tambe, segun Sr. Roland van Trikt, di ATIA.