Un di e parti mas menos agradabel di biahamento den avion ta e experencia di pasa diferente controlnan di siguridad unda tin fila nan pa warda. Banda di warda den fila nan y cana cu maleta nan di man, ainda tin chens cu nan por saca di bo maleta un boter di biña of un perfume cu no ta permiti pa hiba den e avion na man.
Den futuro, kisas no pa siguiente vacacion pero si ta confirma cu e Gobierno di Reino Uni lo bay elimina algun di su restriccion nan pa e articulonan cu por wordo hiba na man, manera likido y cremanan. Esaki lo bay ta posibel ora cu nan introduci scanner nan 3D di tecnologia avansa.
Mientrastanto “Administración de Seguridad en el Transporte” di Merca, desde aña 2018 a pone e tecnologia aki na prueba den 15 aeropuerto cu ta inclui Los Angeles, Oakland, San Diego y Chicago. E plan ta pa sigui pone e aparatonan aki den mas aeropuertonan na Merca.
Si pasa na e aeropuerto di Schiphol na Amsterdam, ta riparabel cu bo no mester separa articulonan personal di likido, ni saca laptop for di tas, dor cu na 2021 Schiphol a bira e prome aeropuerto grandi na nivel internacional cu a instala e tecnologia nobo aki cu ta e scanner 3D y a ponenan di biaha den practica.