Durante un conferencia di prensa den centro di prensa di Nou Camp, e futbolista Leo Messi a despedi di e organisacion di Barcelona, cual ekipo el a wordo forma como e super estreya cu e ta awe.
For di un edad hopi jong, Messi a biaha cu su famia pa biba na e ciudad di Barcelona, caminda el a forma su mes ainda mas den su capacidad futbolistico pero cu awor a yega su fin ora cu e ekipo no tin forma financiero pa dune un contract multi miyonario.
Cu lagrima na wowo Messi a despedi den un ceremonia sumamente emocional, caminda ainda su destino no ta sigura, esta na unda e lo bay hunga proximamente pero e parti doloroso ta e hecho cu Messi su bida como futbolista, como tata di famia, ta concentra na Barcelona, caminda e tin negoshi, su yiunan ta bay scol y ta su cas permanente ya cu el a nace na Argentina pero a cria y forma su mes na Barcelona.
Sinembargo ta un hecho mescos cu tur otro gran estreya den tur deporta, cu tur tempo glorioso tambe tin nan final y den Barcelona esaki a termina no solamente pa Messi pero pa tur fanatico di e tremendo ekipo aki.
Tin cu corda cu Messi no ta e prome super estreya cu a bay laga Barcelona pero por menciona Johan Cruijff cu a inicia e era nobo di exitonan tanto como hungado y como entrenado, sigui despues pa gran hungadonan manera Rivaldo, Romario, Xavi Hernandez y sin duda Ronaldinho kendenan a marca historia y despues a bay.