Awe mainta a tuma luga firmamento di un acuerdo entre Aruba Tourism Authority (ATA) y Comite Olimpico Arubano (COA), como muestra di e sosten continuo cu e autoridad di turismo ta dun’e organisacion olimpico.
Segun Ronella Croes, CEO di ATA, cu firmamento di e acuerdo, ta celebrando de facto cuater aña consecutivo di apoyo di parti di e autoridad na COA, y na nos atletanan basicamente.
Cu e acuerdo aki ta firmando e sosten y comprometiendo n’e sosten di aña 2024 y 2025. Ta hacie extra special, e echo cu e aña aki tambe ta aña di e weganan Olimpico na Paris, cu lo cuminsa dia 26 di juli.
Pa ATA ta un gran satisfaccion di por a tuma nota di e echo cu te cu aworaki, tin tres atleta confirma como participante n’e weganan Olimpico aki y cu algun otro atleta ta den etapa di clasificacion y potencial participacion tambe n’e weganan Olimpico.
Esaki ta yena ATA cu extra orguyo pasobra e acuerdo cu a bin ta firma cu COA ta netamente pa formacion di nos atletanan. Por a mira nan ta briya den diferente area tanto regional como mundial. Segun Croes, di parti di ATA y nos comunidad completo ningun hende no por nenga e avance cu a bin ta mira den e area aki, si considera e resultadonan tambe.
E resultadonan ta papia pa nan mes. Esey ta duna ATA un gran satisfaccion di por sigui colabora cu COA tambe. Ta importante pasobra nos atletanan aki ta briya internacionalmente, pues e ta pone pais Aruba tambe y den termino di mercadeo y promocion di Aruba, e marca Aruba ta briya y ta destaca unda cu nan ta.
Nan ta embahador di nos pais y ta p’esey tambe ATA ta duna su sosten. No solamente p’esey. Nan ta briya internacionalmente, pero localmente tambe nan ta briya. Nan ta sirbi como ehempel, como estimulo y motivacion pa otro, pa mira cu soño por wordo realisa y cu empeño y determinacion por logra.
Esey ta algun di e factornan cu ta importante. E punto toch importante tambe pa remarca ta e echo cu ta futuro lider di nos comunidad. Esaki ta un manera con ATA tambe ta contribui na formacion di ciudadano cu lo yuda carga e desaroyo di nos pais.
Como ATA mes kier gradici esunnan cu a hunga un papel importante pa logra tur e aspectonan aki. Tin di cuminsa toch cu Nicole Hoevertsz, kende ta e cara di Comite Olimpico Arubano pero tambe tur esfuerso cu aña aden y aña afo a resalta y a pone Aruba briya, formando red internacional aki, pero tambe Wanda Broeksema y henter e hunta di COA pa tur nan esfuerso, sin lubida tur coach, entrenador, ekipo grandi cu ta tras di e atletanan y e otro partidonan manera ATA cu tambe a uni nan mes n’e causa y a duna nan sosten. Por ultimo e streanan mes, gradiciendo e atletanan pa nan determinacion, nan dedicacion y e forsa cu nan ta mustra pa por bin cu logro asina importante. Si nan no a logra, sigur nan empeño cu nan ta pone den esaki cu ta un ehempel pa cada un di nos.
Esaki ta forma un parti integral di maneho di ATA, algo cu nan ta haci pa yuda deporte. Pero ta hacie di un otro forma tambe. E meta principal di ATA ta mas cu claro promove y posiciona Aruba internacionalmente y atrae e bishitante desea. Ta p’esey ta mira e aña aki un ripiticion di Aruba High Winds cu Aruba di ATA, ta mira un KLM Marathon tambe y un Aruba Beach Tennis International, cu tambe ta conta cu e sosten di ATA. Cada un di e eventonan aki ta brinda oportunidad na nos bishitantenan, pero primordialmente tambe na nos mesun atletanan local.
Esaki ta un otro ehempel di kico ta importante pa ATA y con nan ta trata di keda den nan enfoke, pero dunando aporte na deporte tambe.
Banda di esaki por bisa cu Ministerio di Deporte tambe tin colaboracion estrecho hunto cu ATA, Lotto pa Deporte, pa fiha tambe diferente evento cu ta yega na nan porta, posibilidad pa Aruba pa evalua kico ta miho y unda ATA por brinda sosten.
Pa yega na un maneho solido pa Aruba, pa medio di locual nan ta maneha, e ultimo lunanan di aña pasa, ATA a traha duro den un investigacion p’asina determina kico mester ahusta na nan maneho.
E investigacion a conta cu un sosten di mas of menos 70 diferente partido, hende cu a consulta, cu ta entre otro importante den mundo di deporte, facilidad cu a analisa localmente, p’asina wak con por haci nan maneho mas skerpi tambe y con por mehora esaki tambe p’e añanan cu ta sigui.
Lo tende un tiki mas den esaki den e proximo simannan, p’asina por duna un tiki mas informacion di kico por ta e ahustacionnan strategico di ATA, esta strategia di pais Aruba pa medio di ATA, sosten na deporte, pero tambe otro tipo di evento y patrocinio.
Wanda Broeksema, presidente di COA, a comenta di ta sumamente contento di a sinta na mesa cu ATA n’e oficina principal di COA.
E prome biaha cu nan a firma tabata na Marriott. Aña pasa a firma na Surfside Marina y no tin un miho luga pa firma un convenio asina importante pa COA y a habri nan oficina principal na maart 2023 hunto cu e bishita di Thomas Bach. Pa nan e oficina principal ta hopi importante.
E ta e cas di nos atletanan, e cas di e federacionnan. Broeksema a agrega cu pa nan ta sumamente importante pa tin continuidad y cu ATA nan a mira y ta hopi contento cu por bisa cu nan a firma un contract di dos aña. Esey ta e resultado di e trabaonan cu nan a bin ta haci.
Trabao transparente, pasobra semper nan ta bay bek na ATA pa splica kico nan a haci, e logronan y tambe e intencionnan, no solamente p’e atletanan, pero tambe pa COA en general y e comunidad.
Esey ta algo bunita, segun Broeksema. Ta importante pa COA pasobra nan por mustra nan stakeholder internacionalmente cu nan tin partner internacional.
Na final di dia e atletanan ta bay afo, nan ta representa Aruba, nan ta promove Aruba. COA ta sumamente contento cu e tres atletanan cu lo bay Paris, en espera di e otronan pa clasifica.
COA ta contento cu e confiansa duna y nada no por haci sin e balornan Olimpico. “Nos balornan olimpico ta nos fundeshi,” ta loke Wanda Broeksema a indica.