Awe, dia 23 di Augustus, Parlamento di Aruba a pasa e ley di All Inclusive, cual den e ultimo dos lunanan tabata tin hopi discusion riba dje. Cu 12 voto na fabor y 8 en contra, e ley pa regulacion di All Inclusive a wordo aproba den Parlamento, despues cu e stemmotiveringnan a tuma luga pa e miembronan di cada fraccion.
Den un sala basta yen, e parlamentarionan a sa di pone nan punto bon cla, pakico si y pakico no e ley aki ta uno bon pa Aruba. Sigur pa Partido MEP y tambe PDR, el a cay manera un baño di awa friu, pasobra den nan concepto, esaki lo ta un riesgo grandi pa nos economia, al igual cu e pensamentonan di AHATA. Pa varios instancia, un estudio mas profundo mester a wordo haci riba e ley aki, pasobra tur a mira cu tin cierto cosnan cu no ta mucho cla, pero durante e reunionnan cu a tuma luga tanto diabierna siman pasa, como awe diamars, minister di turismo, Otmar Oduber, a sa di pone su punto cu esaki lo regula e maneho di All Inclusive. E reunion aki a finalisa pasa di 6’or di atardi,
Fuera di e ley aki, tabata tin 7 mocion y 3 amienda cu e Parlamentarionan a vota pe. E reunion aki por a wordo sigui tanto riba Parlamento.aw como riba canal 46.