AMSTERDAM, Hulanda- E imagen ganado di e World Press Photo, captura pa John Moore, ta mustra e angustia di un mucha chikito mientras cu su mama ta wordo registra pa un oficial Mericano na e frontera cu Mexico.
E di 62 edicion di e premionan anual World Press Photo, esun mas prestigioso den e ambito di fotoperiodismo, e fotografo Mericano John Moore a wordo premia cu e galardon maximo pa su imagen titula “Crying Toddler at the Border”.
E potret a wordo saca dia 12 di juni 2018 na McAllen (Texas), cerca di e frontera cu Mexico y ata mustra Yanela Sanchez, un mucha Hondureño di dos aña, den estado di angustia mientras su mama Sandra ta wordo registra pa un agente fronteriso.
E administracion di e presidente Donald Trump e tempo ey a anuncia un politica migratorio controversial bou di cual personanan cu crusa e frontera di Merca ilegalmente lo por wordo persigui penalmente. Hopi ta e mayornan cu a wordo separa for di nan yiunan door di esaki.
“Mi por a wak e miedo riba su cara, den su wowo”, Moore, fotografo di Getty y ganado di e premio Pulitzer di fotografia ta bisa na AFP. E potret ta ilustra “violencia di otro tipo, cu ta psicologico”, miembronan di e hurado a expresa.
Poco despues a sali na cla cu e mama y su yiu no tabata ariba e lista di famianan cu a sufri separacionnan forzoso, pero e imagen a bay viral y esaki, según huradonan, a contribui na cu Trump a reverti e politica migratorio aki un par di dia despues.