Recientemente Cruz Cora a tuma nota di algun declaracion di ciudadanonan den nos comunidad den medionan di comunicacion, cu nan peticion pa ayudo humanitario den forma di cuminda a wordo nenga inhustamente. Cruz Cora a tuma nota di esaki y a bay den accion imediato pa investiga si e ciudadanonan aki mester a recibi ayudo humanitario, conforme reglanan di aplicacion mirando cu un di e principionan fundamental di e organisacion ta pa duna sosten humanitario sin distincion den raza, nacionalidad y/of religion.
PROCESO DI APLICACION PA AYUDO HUMANITARIO
Durante e temporada di COVID-19, Cruz Cora a ricibi mas cu 12.000 peticion adicional pa ayudo cu cuminda y/of vouchers di supermercado y ta procesa cada un di e peticionan aki cumpliendo cu e criterianan stipula di un manera structura. Cruz Cora na su turno ta haci su mayor esfuerso pa por acomoda tur ciudadano den necesidad di ayudo lo mas pronto cu ta posibel, no obstante e impacto sin precendente cu COVID-19 a ocasiona. Cruz Cora su voluntarionan ta trahando di dia y anochi pa agilisa e procesonan existente y sigura cu tur persona cu ta califica pa ayudo humanitario, por ricibi esaki lo mas pronto posibel. E impacto di e demanda pa asistencia humanitario ta grandi y ta rekeri un proceso di registracion structura pa asina garantisa cu e ayudo ta yega cerka esnan cu tin mas mester di dje.
SITUACION SIN PRECEDENTE
Na momento cu Aruba a conoce su promer caso di COVID-19 na maart ultimo, Cruz Cora a activa su team di voluntarionan mesora cu e meta pa yega na suficientente recursonan pa duna e sosten necesario na esnan mas vulnerabel den nos comunidad cu a perde nan entrada y cu no tin cuminda pa come.
A reparti te cu awor 25.000 mil cuminda cayente y a otorga 8.500 voucher pa supermercado na varios famia den necesidad. Tur informacion financiero di e proyectonan di Cruz Cora ta wordo raporta den e cuentanan anual di Cruz Cora mescos tambe e proyecto specifico cu fondo di gobierno Hulandes pa cu e necesidad humanitario agudo cu COVID-19 a trece cu ne. E proyecto aki ta wordo supervisa y evalua door di Hulanda pa sigura cu e ta cana debidamente na cada isla y primordialmente cu fondonan destina na esnan den necesidad, berdaderamente ta yega su destino final.
URGENCIA
Cruz Cora ta compronde e urgencia pa asistencia humanitario, muy en especial ayudo alimentario, y a tuma nota di e aplicantenan cu a sinti cu no a wordo atendi segun expectativa. Lastimamente tin varios caso di persona cu intencion menos noble cu ta purba di abusa di e ayudo humanitario di Cruz Cora y otro organisacionnan cu tambe ta brinda ayudo. Pa sigura cu tur ayudo ta bai na esnan mas vulnerabel, ta rekeri pa haci un proceso di registracion cu ta determina si un persona berdaderamente ta califica pa ayudo humanitario.
DEDICACION
Cruz Cora y su voluntarionan ta lanta tur dia, no obstante e situacion dificil cu nos comunidad ta pasando aden, cu un animo, dedicacion y amor incondicional pa sigui yuda esnan cu mas tin mester di dje. Homber y muhenan balente cu semper tey pa sostene abo den un di e momentonan mas dificil den e historia di nos pais! Hunto nos lo sa di surpasa e crisis aki si nos tur extende nos man!