Cruz Cora Aruba y SMAC ta firma acuerdo pa CARNAVAL 65

Diabierna tabata un mainta di ambiente na Cruz Cora Aruba, Dakota, unda a firma acuerdo cu SMAC pa Aruba su Carnaval. Cu grato placer a wak miembronan di prensa yega pa e prome conferencia di Cruz Cora pa 2019 y a desea otro Bon Aña mientras a ricibi Presidente di SMAC, Sra. Shannon Henriquez, Tesorero di SMAC, Sr. Hubert de Cuba y voluntarionan di Cruz Cora Aruba.

Tambe a duna bon bini na Cruz Cora, Sr. George Wong, General Manager di Caribbean Overseas. E compania aki a wak e importancia di e participacion di Cruz Cora den Carnaval di Aruba y mesora a uni su mes na e peticion di Cruz Cora pa duna un man cu e gastonan di temporada di Carnaval cu un suma generoso y asina duna SMAC di e manera aki un ayudo. Asina Caribbean Overseas a bira e prome sponsor financiero di Cruz Cora den Carnaval.
Cruz Cora Aruba ta sumamente agradeci na SMAC pa e confianza, Caribbean Overseas pa e sosten financiero y na tur e otro companianan cu ta sostene Cruz Cora cu producto durante e temporada manera: Compra Aruba NV, Aruba Aloe, Tec Inc., Tropical Bottling, Manrique Capriles. Pa mas informacion con pa yuda Cruz Cora di cualkier manera: [email protected]
Cruz Cora Aruba kier desea Aruba un feliz temporada di Carnaval, pero kier pidi si pa PROTEHA Y CUIDA NOS MUCHANAN, esaki ta nos DEBER Y OBLIGACION!

Comments

comments