Cruise Coordinator nobo na Ofisina di Turismo

Boneiro:  – Ofisina di Turismo (TCB) ta kontentu di anunsia ku for di 1 di yanuari 2020 tin un Cruise Coordinator nobo. E Cruise Coordinator ta sr. Rolando Marin. Rolando no ta un persona deskonosi den e sektor di turismo i sigur no den TCB. Rolando tin mas ku 25 aña ta trahando na TCB.

Di 1985 pa 1994 Rolando a traha den diferente kompania den e area di turismo entre otro na Bonaire Trading Company, na check in bali na airport, Budget Rent A Car, frontdesk na Hotel Bonaire, kual e tempu ei tabata e hotel mas grandi na Boneiru. Na 1994 Rolando a kuminsa traha na TCB i su trabou prinsipal tabata pa duna informashon na turistanan ku bishita TCB. Despues su trabou a bira un mas amplio kaminda el a kuminsa asisti den parti di krusero, atende den e parti di agensia di biahenan, asisti ora grupo di filmashon bishita Boneiru i ultimo tempu tambe atende den e parti pa duna tour/informashon ora ku ‘vloggers’ bishita Boneiru pa skibi artikulo.

Rolando su funshon anterior na TCB tabata Information Officer, pero mirando kuantu eksperensia e tin den e parti di krusero, i kon e ta eherse su trabou ku hopi amor i pashon, e ta e persona adekua pa e posishon di Cruise Coordinator. I e tin e konosimentu tambe den e area aki, mirando ku for di 2013 el a asisti di aserka e anterior Cruise Coordinators den nan funshon. A bishita na diferente okashon e konferensianan di FCCA (Florida Caribbean Cruise Association) na Miami. I esaki a dune e gana tambe pa por tuma e reto di bira Cruise Coordinator.

Rolando ta un persona amabel i semper ta kla pa yuda kaminda por, e ta un persona ku por konta hopi historia tokante turismo di Boneiru, mirando kuantu aña di ekperensia e tin den e area aki. Rolando ta looking forward pa e challenge nobo aki.

Henter e tim di TCB ta hopi kontentu i ta desea Rolando hopi eksito den e funshon nobo aki.

Comments

comments