CARACAS, Venezuela- Diaranson e represion contra di parti di forsanan di siguridad contra di manifestantenan na Caracas a aumenta. Potretnan ta mustra hendenan kima y hopi di nan ta cay flauw. Pero no tin niun indicacion cu opositornan tin pensa di bandona caya, di stop cu e manifestacion.
Un hoben di 18 aña morto, otro ta bay bou di e tire di un tanki militar, varios a cay flauw y dos otro ta cende nan mes na candela. Esaki ta mustra e nivel cu e violencia den e pais Suramericano a yega y e represion di e forsanan di siguridad durante e protestanan contra di e gobierno di Nicolas Maduro na Venezuela.
E prome victima a wordo identifica como Armando Cañizalez, y ta conoci cu el a muri door di un herida na su garganta cual a pone su curason a stop di bati. E hoben cu tabata bou di e tanki militar no ta conoci si e ta na bida of e ta morto. Potretnan circulando ariba internet ta mustra e tanki guera di e Guardia Nacional Bolivariano, cu tabata esun encarga durante e ultimo simannan aki pa reprimi e manifestantenan durante e protestanan. Mientras cu e hoben no ta move, un otro grupo ta purba di hala e tanki di guera pa saca e hoben for di eybou.
Na e mesun luga, dos hoben ta cende nan mes na candela den pleno protesta despues cu un tanki di gasoline di un brommer di polis a explota. Otro versionnan ta indica cu e hobennan a kima mientras nan tabata cende bombnan casero.
Mientras e protestanan tabata sigui, diaranson e presidente di e Conseho Nacional Electoral, Tibisay Lucena a duna Maduro su garantia pa activa un Asamblea Constituyente, cu cual e mandatario ta pretende di scirbi un constitucion nobo al estilo Chavista y lo likida tur e podernan publico, incluyendo Asamblea Nacional, di mayoria opositor.
Den e luna cu a transcuri, oposicion Venezolano a mantene su mes riba caya protestando contra di e crisis politico y economico, genera pa e gobierno di Maduro. E manifestacionna a bin door di e sentencia di Tribunal Supremo de Justicia (TSJ) cu a kita e inmunidad y funcionnan di e diputadonan di e Asamblea Nacional.
Pero e oposicion ta mantenen nan mes ariba caya tambe pa e descontento pa e inflacion di tres digito cu ta consumi e sueldo, pa e escasez di cuminda di casi cualkier alimento y medicina basico. Tambe door di e represion di parti di e forsanan di siguridad cu ta bira pio ora pa ora.
Asina mes cu e represion, lidernan di oposicion a sigui convoca mas actividadnan riba caya y e ciudadanonan a responde na e yamada aki.
Fuente: Reuters