Aqualectra, e empresa di servicio publico di Corsou, ta den un situacion desespera. Tres di e cuater miembronan di directiva a retira entrante prome di januari 2024.
Nan ta bisa cu nan ta enfrenta “reto gigantesco” y e falta di sosten di e accionista: e Conseho di Minister di e ministernan di MFK y PNP. E comisarionan ta culpa e ex-director ehecutivo Darick Jonis, di kende, segun nan ta bisa, “a sconde informacion conscientemente” y “actua di manera engañoso.”
E comisarionan, entre nan e expertonan Karel van Haren (comercial), Austin Martina (awa) y Patrick Aberson (financiero), ta indica cu ultimamente nan trabao a bira “dolorosamente” imposibel. Segun nan, e hunta general di accionista no a logra atende un “situacion ongezond” dentro di e empresa.
E situacion a bira pio ora cu Jonis, a pesar di e pruebanan di mal maneho, a sigui ricibi sosten di e hunta di accionista. “E abundancia di prueba y conseho di e Hunta di Supervision pa interveni, nunca a duna espacio na un resultado substancial,” un di e comisarionan a afirma. Nan ta critica e accionistanan pa no interveni a pesar di multiple blackout y un supuesto demanda multimiyonario contra Aqualectra.
E empresa ta enfrenta reto grandi, entre nan garantisa e suministro di coriente y modernisa e red. Esey ta rekeri un presupuesto di inversion di 750 miyon florin. “Pa enfrenta e desafionan ey, ta esencial cu tur parti dentro di e organisacion traha hunto,” e comisarionan a bisa.
COBARDE Y DI MALA FE
E Minister di Desaroyo Economico, Ruisandro Cijntje, a cualifica e accion di e comisarionan como un acto di cobardia y mala fe.
Segun Cijntje, e comisarionan tabatin e responsabilidad di rindi cuenta di e acontecimentonan durante nan mandato, specialmente mirando e gravedad di e acusacionnan contra Jonis. “Na momento cu tin delito cometi, nan mester a sinta y duna splicacion pasobra p’esey a apunta nan,” Cijntje a bisa den un entrevista cu matutino Extra.
Cijntje tambe a critica e forma cu e comisarionan a suspende Jonis sin dun’e e oportunidad di defende su mes. Desde e salida di Jonis, Aqualectra a wordo dirigi p’e director financiero Neysa Isenia. E minister ta puntra con hende por sigui tin confiansa den un grupo di persona cu “simplemente ta lanta y bandona e barco.”
Pa confronta e crisis, e minister lo nombra dos comisario nobo pa substitui e miembronan cu a bay.