WASHINGTON/CARACAS – “Despues di a caba cu PDVSA completamente, caminda cu no a resta nada mas pa horta, ta bin un cambio den e atencion di e regimen di Maduro riba oro, cu ta e recurso nobo cu nan ta buscando”, e secretario asistente di Tesoro Mericano Marshall Billingslea, den un conferencia den e centro di estudio Brookings di Washington, segun EFE.
Billingslea a denuncia e expropiacion di e minanan di orto den zuid di Venezuela, y el a sigura cu “un situacion similar na e diamantenan di sanger na Africa” ta yegando cerca: “Nos mester expresa nos indignacion mas pa e daño cu e ta causando na medio ambiente y e poblacion indigena”, el a bisa.
E funcionario Mericano, cu ta na cabes di e Oficina di Financiancion Terorista y Crimen Financiero di Tesoro, a splica cu den e ultimo lunanan ta calcula cu “21 ton metrico di oro” lo a sali for di Venezuela, cu a bay pa Turkia principalmente.
Na e prijsnan actual ariba mercado, e cantidad aki lo ta ekivalente na 840 miyon dollar.
Oro ta wordo saca for di e pais sin cu tin un contabilidad algun pa sa unda e fondonan ta bay para”, Billingslea a indica.
“No ta trata di minería convencional, esaki ta destruccion di e boskenan creando cantidad di awa para cu ta wordo contamina cu mercurio y otro kimiconan. E lo ta un catastrofe medioambiental durante varios decada, con brotenan di malaria, dengue; y e malesanan aki lo move bay pa e region hunto cu e miyones di refugiadonan”, el a agrega.
Siman pasa, e Asamblea Anual di Fondo Monetario Internacional (FMI) na Indonesia, e secretario di Tesoro di Merca, Steven Mnuchin, a censura den un comunicado “e benta secreto di recursonan di e pueblo Venezolano pa yena e saco di e facilitadornan financiero di Maduro”.
Merca a aumenta e presion ariba Caracas cu sancionnan economico sucesivo na personanan den cargonan halto di e gobierno di Maduro, incluyendo e Prome Dama Cilia Flores y varios minister, cualnan ta wordo acusa di represion y abuso di derechonan humano.
Venezuela ta bibando un crisis economico profundo y prolonga, cu’n hyperinflacion superior na 1.000.000 % anual y e escasez di alimento y medicina cu a forsa e salida di 2.5 miyon persona den e pais rumbo pa Merca.