E noticia di fayecimento di e baby di dos luna, ta bolbe pone ariba mesa e urgencia pa bin cu e eehcuccion di e ley di creche. Minister di Enseñansa, drs. Rudy Lampe ta amplia mas ariba esaki.
Minister a expresa su palabranan di condolencia y desea a famia hopi forsa. Pero el a manifesta tambe e urgencia pa bin cu e ley di creche pero nan ta wardando ariba un rapport di expertonan cu a keda encarga cu esaki bou di e gobierno anterior.
Minister Rudy Lampe a expresa cu ta poniendo hopi presion pa mas pronto cu ta posibel ricibi y trece dilanti e producto aki, y hunto cu departamentonan concerni, Directie Onderwijs y Inspectie Onderwijs , anto e ora gobierno lo por bay over na implementa e ley aki, pasobra mester tin control riba e calidad di loke ta wordo ofreci den creshnan, cu no por sigui opera sin ningun tipo di control.
Di mes manera, Minister Rudy Lampe a splica cu un bes cu e sistema contempla den e ley nobo wordo aplica, institucionnan den e area aki lo mester bay aplica pa por haya verguninng y ta bay tin control constante riba e servicio cu ta wordo ofreci. Cuido di nos muchanan y nos babynan stima, cu ta e parti mas vulnerabel den nos comunidad sigur ta merece e proteccion aki.
Algun tempo atras of un 2 aña pasa Wit Gele Kruis hunto cu Salubridad Publico y otro instancianan a yega di bay controla un promedio di 20 luganan di cuido di mucha caminda cu nan a cera algun cu no tabata cumpli cu e reglanan. Riba e punto aki minister a haci enfasis tocante cu lo por bin cu cierto control inmediato, pero tanten cu no tin ley, full e cuadro legal, no ta na su luga, cu e parti di ehecucion inclui, e ora e no ta optimal y esaki ta lo cual mester a bin cun’e dilanti den e ley.
Castigonan legal lo por bin na luganan cu ta opera den forma clandestino den e sector aki di cuido di mucha, pasobra tur hende mester ta consciente cu traha cu mucha lo ta un enorme responsabilidad y p’esey Minister drs. Rudy Lampe ta invita henter comunidad pa uni forsa pa proteha no muchanan stima.