Sra. Jossete Daal directora di SKOA ta splica con e crecemento na scolnan cu ta resorta bou di SKOA ta actualmente.
Scolnan bou di SKOA ya tin dos aña caba cu nan a cumisna crece. E scolnan preparatorio, e muchanan ta drenta cu 4 aña y SKOA tin afspraak pa varios aña caba cu ta mantene e muchanan den klas na 27. Pero den e ultimo tres añanan no por want’e mas y den pasado tabata tin e kleuterschool na Tanki Leendert, tabata un kleuterschool cu no tabata yena mes ora e prome simannan.
Pa october e scol ta yen. Aworakinan, ora di inscripcion tur nan scolnan ta yen. E ta algo increibel y segun Sra. Daal, ta papia di yen di 28 mucha den klas. Tur hende sa cu awendia cu mas di 25 mucha den klas cu un docente so, ta hopi dificil. E ta hopi, hopi dificil pasobra cada mucha ta exigi mas atencion cu antes, di 40 aña pasa caminda pensamento di comunidad y educacion na cas ta diferente. Aworaki SKOA ta preocupa cu muchanan cu ta caba zesde klas, di scolnan catolico cu mester drenta MAVO, no tin luga pa carga tur.
E ta un preocupacion, y esaki ta e periodo cu ta prepara pa e aña escolar nobo. Awo ta kibrando cabes con ta bay atende cu e asunto aki. Y esaki ta tur scol na Aruba, no di SKOA. e cantidad di alumno cu mester drenta scol a bira mas halto. Pa esaki, mester bin cu un solucion a corto y mediano plazo.
Ta bay habri un extra klas na un kleuterschool y esey tambe ta bira un problema cu mester atende cun’e y segun Sra. Daal, ta spera cu por haya maestro pa para den klas tambe. Un posibel solucion ta, door cu e klasnan ta grandi y ta dificil pa duna tur mucha atencion, bin cu klasnan extra pa no pasa e limite di alumno. Muchanan di awendia ta exigi mas atencion na scol. Un maestro ta keda hende y lo mester traha 10 luna cu nan. Cada mucha cu nan pakete y e no ta facil. Un solucion ta pa pone un assistent den klas. Pregunta ta keda cu si tin suficiente assistent pa pone den klas. Esey ta un solucion posibel a corto plaso. E ta bira un reto pa e aña escolar, for di kleuterschool te cu scolnan secundario.
Door cu San Nicolas ta basta trankil, e scolnan eynan a bira bashi door cu mayornan a move bay direccion hotel unda nan a haya trabao. Noord a crece, pero San Nicolas a bira mas chikito. Si un mucha di MAVO wordo ubica na un scol na San Nicolas, pero pregunta ta si e mayornan ta acepta e reto aki. Pero esaki pa SKOA ta un punto garantisa cu por ofrece e dos scolnan di MAVO cu SKOA tin na San Nicolas.
Esey ta loke SKOA ta trahando ariba dje, pa wak ki sorto di solucion nan por bin cun’e y kico SKOA por ofrece e mayor tambe, pa e por ta trankil ora su yiu mester drenta e scol nobo e aña escolar benidero.
Noord tabata un distrito cu tabata tin demanda, pero el a bira Oranjestad pero Paradera tambe ta hopi den demanda pa scolnan. Poco poco e barionan ta cumisna yena. Sta. Cruz por ubica algun alumno ainda, pero na Sta. Cruz tin basta scol, dus muchanan di 6e klas, cu ta caba scol y drenta MAVO ya caba nan mes a yena e scol caba. Dus no tin mas cupo pa muchanan di otro distrito.
Na diferente ocasion cu SKOA a papia cu Ministerio di Enseñansa nan a señala e situacion aki, dus e situacion di pais Aruba ta conoci.
Pa e proyecto Dreamers, segun Sra. Josette Daal, a corto y largo plaso lo mester wak con ta bay acata e proyecto aki, unda cu lo mester ofrece muchanan cu ta na bo pais, un enseñansa di calidad.