Banco Central di Aruba (BCA) a publica “State of the Economy” pa e prome mita di 2019. E publicacion aki ta duna un synopsis di e desaroyonan economico local y internacional di e periodo aki. E puntonan mas importante relaciona cu e parti domestico ta presenta abou, incluyendo un resumen di e indicadornan economico principal.
Data disponible ta indica cu economia di Aruba a crece moderadamente durante e prome mita di 2019 compara cu e mesun periodo di e aña anterior. Aruba su sector di turismo a presta bon den e prome seis luna di 2019, apesar di e bahada continua den e mercado Venezolano. Mayoria indicador di consumo ta sugeri un desaroyo negativo den consumo durante e prome seis luna di 2019. Confiansa di consumidor a bira mas pesimista den e di dos trimester di 2019, compara cu e ultimo trimester di 2018. Esaki tabata mas tanto relata na e deterioro di nan posicion financiero. Indicadornan di inversion pa januari-juni 2019 ta indica un aumento den inversion, maske e indice di percepcion di negoshinan (BPI) a mustra un nivel creciente di pesimismo den e di dos trimester di 2019.
E tasa di inflacion promedio anual tabata 4,3 porciento na juni 2019, e resultado di prijsnan mas halto pa cuminda y gasolin y tambe di un subida den e prijs di cierto servicionan di comunicacion. E tasa di cambio real di e florin vis-à-vis e dollar Mericano a bin ta subi desde e prome trimester di 2018, debi na e desaroyo den prijsnan cu ta parcialmente e resultado di cambionan den maneho fiscal.
Aruba su deficit comercial a yega te na Afl. 1.004,5 miyon den e prome mita di 2019, locual ta un reduccion di 2,3 porciento compara cu e mesun periodo di e aña anterior. E cuenta coriente di e balansa di pago a registra un surplus di Afl. 252,5 miyon den e prome mita di 2019, cual ta mas grandi cu den e mesun periodo di 2018, principalmente relata na e prestacion fuerte di e sector turistico. Adicionalmente, pagonan pa importacion di bienes a cai cu 7,4 porciento te na Afl. 1.043,2 miyon. E cuenta financiero a resulta den un prestamo netto na exterior di Afl. 236,7 miyon den e prome mita di 2019, compara cu 68,4 miyon un aña anterior, principalmente
pa motibo di e compra neto di titulonan di equidad y debe stranhero door di inversionistanan residente priva.
Placa den circulacion a subi te na Afl. 4.435,3 miyon na final di e di dos trimester di 2019, un expansion di Afl. 57,7 miyon compara cu december 2018. E crecemento di e placa den circulacion tabata causa completamente pa un aumento den e activa domestico netto di Afl. 61,7 miyon, e resultado di un subida di Afl. 114,3 miyon den credito domestico. E reserva di divisa a baha levemente cu Afl. 4,0 miyon.
Den e prome mita di 2019, gobierno di Aruba a registra un surplus financiero (a base di cash) di Afl. 16,6 miyon, of 0,3 porciento di e PDB estima, un mehoracion di Afl. 30,1 miyon compara cu e mesun periodo di 2018. Impulsa pa entradanan di BBO, entradanan di gobierno a subi cu Afl. 46,4 miyon (+7,0 porciento) den e prome mita di 2019, compara cu e mesun periodo di 2018 y a registra un total di Afl. 712,8 miyon. Gastonan (a base di cash) a crece cu Afl. 19,2 miyon (+2,8 porciento) te na Afl. 694,5 miyon den e prome dos trimesternan di 2019 compara cu e mesun periodo di 2018. E crecemento aki ta atribui principalmente na un aumento den gastonan pa bienes y servicionan. Den e prome dos trimesternan di aña e debe di gobierno a expande cu Afl. 39,3 miyon te na Afl. 4.338,4 miyon, igual na 74,4 porciento di PDB estima.