LOS ANGELES, CA (Merca) – E leyenda di comic Stan Lee, creador di e personahenan emplematico manera Spiderman, Fantastic Four, Iron Man, Thor of Hulk, a fayece dialuna na Los Angeles na edad di 95 aña, segun e medio specialisa den noticia di famosonan Mericano, TMZ. “Mi tabata tabata stima su fanaticonan. E tabata e homber mas decente y grandi”, Joan Celia Lee, yiu muhe di e dibujante a informa.
E prome informacionnan a sigura cu Lee (New York 1922) a wordo traslada durante horanan trempan di mainta for di su cas na Hollywood Hills pa un hospital di Los Angeles, unda cu e ta bin fayece. E autor tabata sufri di varios problema di salud den e ultimo temponan y ya caba na 2017, el a perde Joan Lee, e muhe cu kende e tabata casa cun’e durante casi shete decada.
Gigante di e comiquitanan Mericano y referencia imprescindibel di e cultura popular den e ultimo mei siglo for di e editorial Marvel, Lee a crea ademas otro personahenan famoso manera The X-Men of Daredevil. E adaptacionnan cinematografico di Marvel, a hiba e artista bek na e focus di e medionan di comunicacion.
“Scirbi cosnan cu abo kier lesa. Si bo purba scirbi cosnan cu bo ta kere cu nan (refiriendo na e publico) kier lesa, abo no conoce nan, pero bo conoce bo mes. Y si bo scirbi algo cu abo lo kier lesa, lo tin otro hendenan manera abo (cu lo gusta loke bo scirbi)”, Lee a bisa na augustus 2018 den un homenahe na su carrera na Los Angeles.
Mas di un decena di peliculanan di Marvel, cu casi tur e protagonistanan crea pa Lee, a wordo produci den e prome decada di siglo XXI, recaudando mas di 20 biyon dollar rond mundo.